"الأطباء" تحيل طبيب "قمر الليالي" للتحقيق: أساء لمهنة التمريض

قررت النقابة العامة للأطباء، اليوم الثلاثاء 22 أبريل 2025، إحالة أحد الأطباء للتحقيق بعد التصريحات التي وصفتها النقابة بالمسيئة التي أدلى بها عبر صفحته الشخصية على فيسبوك، بحق مهنة التمريض، والتي تضمنت إهانات واضحة لأفراد الفريق التمريضي، دون مبررات مهنية أو أخلاقية وفقًا لوصف النقابة.

وفي السطور التالية يستعرض موقع الأيام المصرية التفاصيل الكاملة لـ قرار نقابة الأطباء ضد الطبيب المسيء لمهنة التمريض عبر صفحته الشخصية على فيسبوك، وفقًا لآخر البيانات الرسمية المعلنة من قبل نقابة الأطباء.

التفاصيل الكاملة لبيان نقابة الأطباء اليوم بشأن الطبيب المسيء للتمريض

وأعربت نقابة الأطباء، عن أسفها الشديد لهذا التصرف، مشددة على أن مهنة التمريض، بكل أعضائها من رجال ونساء، تشكل عنصرًا أساسيًا في المنظومة الصحية ولا يمكن الاستغناء عن دورها في دعم الأطباء وتقديم الرعاية الصحية المثلى للمرضى. 

وأكدت النقابة أن الاحترام المتبادل بين كل أفراد الفريق الطبي هو من المبادئ الأساسية لأخلاقيات المهنة، ولا يجوز التعدي عليه بأي حال من الأحوال، بناءً على الشكاوى التي وردت إلى النقابة، تقرر إحالة الطبيب المعني إلى لجنة آداب المهنة للتحقيق فيما صدر عنه من إساءات ومحاسبته وفقًا للوائح المعمول بها.

وترجع أحداث الأزمة إلى نشر أحد الأطباء بمستشفى القصر العيني المنشور الآتي: "الجرّاحين العواجيز اللي زي حالاتي طول عمرهم متعودين ان حكيمه العمليات بتبقي واحده ست، متجوزه بقي و لا بنت بنوت مش مهم، المهم إنها تكون ست،
الستات برضوا حنينين، و البصّه في وشّهم بتشفي العليل ، فما بالك بالجراح الشقيان ! و بعدين هما أساتذتنا القدام زمان كانوا هبل مثلا ، راشمعنا يعني اختاروا الستات لغرف العمليات !!
كانوا اساتذه بجد ،
حتي في اختياراتهم،
و عشنا علي كده سنين و سنين أنا و الجراحين ، المخضرمين اللي زي حالاتي:
الحكيمات ؛؛ ستات، 
لغايه ما اقتحم المهنه ، الخناشير،
الرجّاله يعني ،

تلاقي الواحد من دول طول بعرض و بيشتغل : حكيمه عمليات ،
طيب أنا طول عمري بسمي حكيمه العمليات اللي بتشتغل معايا في العمليه ،
بسميها ؛ قمر الليالي:
هاتي مشرط يا قمر الليالي ،
هاتي مقص يا قمر الليالي،
أو امسكي الشفاط يا قمر الليالي ،
و بتبقي مبسوطه و قلبها بينط من الفرحه ، من اسمها الجديد،
إنما الأخ الخنشور ده هانده عليه و أقول يا إيه ؟
الحقيقة بقول له برضو : يا قمر الليالي ،
و يزعل بقي و لا ما يزعلش ، يتفلق،
هوا أنا هاركز في مخ العيان و لا في الشحط اللي معايا  ،،
و بعدين مع الوقت الشحطّه اكتسحوا الملعب ،
و شطّار الحقيقه،،
و بقي الستات في العمليات عمله نادره،
النهارد كان عندي عمليه ، و النهارد شم النسيم و مش عاوز وجع دماغ ، عاوز اخلص العمليه و تني مروٰح للترمس و البيض الملون،
و مش ناقصه خناشير هيه،
و لجل رحمه ، ربنا بواحد زي حالاتي نازل يشتغل في الاجازه ، تطلعلي حكيمه العمليات واحده بنت،
و مش أي واحده،
دي ظابط في القوات المسلحه،
يعني جمعت بين الحسنيين:
الالتزام و الشطاره ،
و الحلاوه و الحنيه ،
مش بس كده ،، دي طلعت من دمياط ،
و أنا من زمان بقول : يا هناه و يا سعده اللي يتجوز من دمياط؛؛
احسن شعب في مصر ، بلا منازع،
شطاره تلاقي و امانه تلاقي ،
و حرص علي الفلوس ( مش بخل لا سمح الله ) تلاقي ،
و أدب ما قولاكش،
و ما يعرفوش الكدب أبدا
و ما يعرفوش قعده القهاوي و لا الكافيهات ،
،و لا الكلام الفارغ ده،،
و فوق كل ده و ده الدمايطه عشره عمر من أيام راس البر.
سبحان الله هي دي كانت عمليه بقي و لا فسحه شمّ النسيم٠"

الأمر الذي أثار غضب رواد مواقع التواصل الاجتماعي وفتح عليه جام غضب السوشيال ميديا وسط مطالبات لنقابة الأطباء وشكاوى عديدة تهدف إلى إحالته إلى التحقيق ومساءلته على تلك الإساءة.

لا يفوتك

نقابة الأطباء تخاطب الجامعات لرفع قيمة مكافأة أطباء الامتياز

نتيجة انتخابات نقابة الأطباء البيطريين 2025 .. أسماء الفائزين

مصر ترفض تهجير الفلسطينيين.. نقابة الأطباء تدين تصريحات ترامب الأخيرة

القطاع الطبي ينهار.. تعليق صادم من نقابة الأطباء بعد استقالة 117 طبيبًا بمستشفيات الإسكندرية| خاص

ويحرص موقع الأيام المصرية على متابعة كافة الأخبار، ضمن التغطية الإخبارية المستمرة والحصرية التي يقدمها الموقع لمتابعيه في مختلف المجالات والتخصصات، ويمكنكم متابعة المزيد من الموضوعات المتعلقة بهذا الشأن عن طريق أخبار مصر اليوم.