رسائل تهديد ومحصلون عند الباب، تجارب صادمة لعملاء البنوك والشركات المتأخرين عن السداد

السبت، 07 مارس 2026 02:50 م

شهدت الفترة الأخيرة تصاعداً في شكاوى المواطنين ضد ممارسات بعض شركات التحصيل والبنوك، التي تستخدم أساليب ضغط غير قانونية للحصول على المستحقات، تشمل هذه الممارسات الاتصالات الهاتفية المستمرة، رسائل التهديد عبر تطبيقات التواصل، زيارة المنازل وأماكن العمل، ونشر معلومات شخصية، وهو ما يثير القلق بشأن تأثيرها على أمن وراحة العملاء وحقوقهم القانونية.

ويروي أحد عملاء البنوك، حكايته مع شركات التحصيل، قائلا "ده الأمر أخطر من كده بكتير.. حتى بنك المصرف المتحد بيستعين بشركات بلطجية لتحصيل أقساطه، بيستخدموا كل أساليب التهديد والترهيب، والتطاول بالسب والشتم عشان يضغطوا على الناس، ده مش بس غير قانوني، ده بيهدد أمن الناس وبيخوفهم بدون أي سند رسمي."

وتابع عميل أخر لشركة تحصيل، "أنا متأخر شهر واحد بس، وفجأة بدأوا يضايقوني.. المحصل بيتصل عليا باستمرار على أرقام مختلفة، يهدد ويشتم في الواتس، ويقول إنه هييجي البيت والشغل، ويفضح الدنيا كلها ويعرض صورتي على الناس ويقول عن التأخر في القسط، كلمت الشركة وقلت لهم، بس المحصل استمر في التهديد وقاللي أدفع الباقي كاش، وهددني إنه يقفل الايسكور ويضغط عليا بطريقة مش مقبولة، الرقم اللي بيتصل منه الواتس يبدو مسروق أو مش اسمه أصلاً، الموضوع وصل لمرحلة إني خايف على نفسي وعلى خصوصيتي، وعايز أعمل محضر وأشتكي لأنه بيهدد ويقل أدبه ويبتزني، ومش هسيب حقى."

فيما تروي عميلة ثالثة رفضت ذكر اسمها، "اليوم حصل موقف مع محصل فاليو جيه نزل الشارع وسأل عني، وطلع البيت يسأل السكان عني، ونزلت له وطلبت النجدة، ولما عرف إن النجدة جاية، اتصل حد من المكتب وقالوله: 'اجري من عندك!' وفعلاً المحصل مشي، لما وصلت القسم، اتصلوا بيا وقالوا: اللي حصل مش من حقه، وإنه موجود لمجرد التعامل مع التعثر، مش تهرب أو نصب.

أنا واحدة عايشة في إيجار، وعندي ولاد في مراحل تعليم مختلفة، وهفضل أحمي ولادي وأكمل حياتي، مش من حق أي حد يجي يقولي خدتي ليه وما سددتيش، ربنا معايا، وهفضل كده لحد ما الغمة دي تزول، واللي هيجي من أي مكتب تحصيل، هعرف أتصرف بحزم."

عمر الكومي يحكي تجربته مع شركة فرصة

"جتلي رسالة من شركة فرصة، وكلمتهم عشان أتأكد. قالولي آخر معاد للسداد النهاردة، وإلا هيبعته محصل ياخد القسطين ومعاهم غرامة 5000 جنيه، والكلام ده كان صادم بالنسبة لي، وكنت مش عارف أتصرف إزاي… هل أسدد الشهر المتأخر دلوقتي، ولا أدفعلهم الشهرين مع بعض؟، قعدت أفكر وأراجع العقد وأشوف إيه الصح، عشان مفيش حد يحب يضغط عليك أو يهددك بالغرامة بدون سبب قانوني."

فيما يروي عميل أخر حكايته مع شركات التحصيل قائلاً “السلام عليكم، أنا متأخرة في سداد أقساط لأحد البنوك وطلبت إعادة جدولة، لكن قالولي حد الائتمان مش يسمح، حاولت أشرح ظروفي، لكن ردوا إنه لازم أدفع مبكر أو هيترفع على قضية، وجاء مندوب للشركة لحد البيت، ومعايا والدتي القعيدة، وكلمونا بطريقة مهينة، وقالوا إنهم هييجوا يعملوا فضايح عشان أخاف وأدفع، وكل شويه كانوا بيطرقوا الباب، حتى لو أنا أو والدتي مش موجودين.

الجيران شافوا إنهم واقفين تحت البيت، وفي مرة حطوا إنذار على الباب فيه تهديد بعمل محضر في القسم، وحطوه على بوابة الشارع عشان أي حد يشوفه، وكأنها فضيحة عامة، مش عارفة أعمل إيه، ووالدتي بتفضل تعيط بسبب كل ده.”

تجربة حاج خالد، “كنت متأخر عشرين يوم بس على آخر قسط عليا، وفجأة لقيت ناس من عيلتي بيتصلوا بيا ويقولولي إن شركة القروض بيبلغوهم إني مبسددش الأقساط، مع العلم إن عنواني مختلف عن عنوانهم، تاني يوم لقيت الجيران بيقولولي نفس الكلام، وثالث يوم لقيت خمس أشخاص تحت البيت بينادوا عليا بصوت عالي، نزلت سألتهم ليه بتشهرو بسمعتي؟ قالوا دي أوامر، وفضلوا يتطاولو عليا، لما رحت اليوم اللي بعده دفعت القسط، مدير الائتمان قال لي: هحافظلك على الاسكور بتاعك… ولقيت فعلاً كل التأخيرات اتسجلت، مع العلم إنهم مكانوش بيدوني أي إيصالات سداد.”

فيما تعرض أحد العملاء لمضايقات متكررة من قبل الجهة الدائنة، شملت اتصالات هاتفية مستمرة ورسائل واتس اب وتهديدات، على الرغم من أن العميل سيقوم بسداد المستحقات كاملة يوم 30 من الشهر الجاري.