علاء مرسى لـ"الأيام المصرية": أنا ليّا بصمتي في التمثيل

الجمعة، 06 مارس 2026 10:49 ص

بثلاثة وجوه فنية مختلفة يطل علينا الفنان القدير علاء مرسي في ماراثون دراما رمضان هذا العام، ليؤكد أنه رقم صعب في أي معادلة فنية يشارك بها، فمن رحلته في عالم "المداح" إلى دراما "إفراج"، وصولاً لرهانه الجديد في مسلسل "عرض وطلب" الذي انطلق عرضه في النصف الثاني من شهر رمضان المبارك، يستمر علاء في تقديم تجارب متنوعة تعكس نضجه الفني وقدرته على اختيار أدوار تترك بصمة لدى المشاهد هو "الجوكر" الذي لا يكتفي بالتواجد بل يسعى دائمًا لتقديم شخصيات تحمل تفاصيل إنسانية وفنية مركبة.

وكان لـ "الأيام المصرية" حوار خاص مع الفنان علاء مرسي حيث كشف لنا من خلاله عن الكثير من كواليس هذه الأعمال الثلاثة والجهد المبذول خلف الكاميرات ليظهر بهذا التنوع، ثم أبحر معنا في رؤيته للمنافسة الرمضانية هذا العام وسر حماسه للتواجد المكثف الذي يرضي شغفه الفني ويحترم ذكاء الجمهور.

3 أعمال ضخمة في سيزون واحد مع مخرجين تقال زي أحمد خالد موسى وعمرو موسى وأحمد سمير فرج, مين فيهم اللي تعب علاء مرسي أكتر في اللوكيشن؟

“التلاتة أساتذة ومخرجين مميزين جداً، وكل واحد فيهم ليه طعم ومنهج خاص بيه، ومحدش فيهم تعبني خالص بالعكس, التعب الحقيقي كان في الشخصيات المختلفة اللي بقدمها والمجهود النفسي اللي بيبذله الممثل عشان يحقق حالة الصدق في كل تفصيلة، والحمد لله أنا سعيد جداً بالتعاون معاهم السنة دي”.

إيه السبب اللي يخليك توافق على أكتر من عمل في نفس الموسم؟

"تواجدي في تلات أعمال ده شيء عادي، الصعوبة بس بتيجي في تداخل المواعيد ساعات، وكمان بنواجه تحدي في فكرة الخروج من شخصية ودخولك في شخصية تانية خالص، خاصة لو الشخصيات دي بعيدة تمامًا عن طبيعتي كإنسان وأحداث حياتي اليومية، لأنها في النهاية شخصيات درامية ليها عالمها الخاص".

مين في الشخصيات دي اللي نقدر نقول إنها قريبة من علاء مرسي في الحقيقة؟

"الشخصيات دي مفيش بينهم أي عامل مشترك غيري أنا كممثل، لكن علاء كشخص بعيد تمامًا عنهم كل الحكاية إني بحاول أطلعهم من جوايا وكأنهم حقيقة عشان المتلقي يصدقني ويحس بالدور، وده أساس شغلنا".

إيه السر أو التكنيك اللي بتعمله عشان تقدر تتنقل بين أكتر من شخصية في نفس الوقت؟

"أنا بفصل تمامًا بمجرد دخولي في كل شخصية، وده نتاج سنين خبرة ودراسة على إيد أساتذة كبار، سواء اللي كنت واحد من جمهورهم أو اللي اتعلمت على إيديهم أكاديمياً وطبعاً الموضوع ده بيساعد فيه توجيهات وملاحظات المخرجين وزمايلي في اللوكيشن، من ممثلين ومؤلفين وفنيين الكل بيبقى مشارك في رسم ملامح الشخصية".

في رأيك مين أكتر مخرج في التلاتة قدر يخرج علاء مرسي بشكل مختلف المرة دي؟

"علاء مرسي واحد وله بصمته اللي الناس عارفاها بس الأدوار الحلوة دايماً بتطلع لما يكون الورق مكتوب كويس ومعاه مخرج شاطر وفاهم، والأهم من ده كله هو "التسكين الصح" إن المخرج يعرف يحط الممثل في المكان اللي يليق عليه ويطلع منه أحسن ما عنده".