عادل أديب: بنتي دارسة العالم القديم والجديد وحاصلة على شهادات من أمريكا (خاص)

الجمعة، 26 ديسمبر 2025 01:14 م

أعرب المخرج عادل أديب عن فخره بابنته أميرة أديب، متحدثًا عن وعيها المبكر بذاتها وتعدد مواهبها ومسارها الدراسي في الولايات المتحدة، مؤكدًا أن النجاح في مجال الفن لا يمنح بالوراثة بل بحكم الجمهور أولًا وأخيرًا.

**صور أرشيفة لعادل أديب وابنته أميرة أديب**

عادل أديب: أميرة درست العالم القديم والجديد

وكشف المخرج عادل أديب، في تصريحات خاصة لموقع الأيام المصرية، عن كواليس مسيرة ابنته أميرة أديب، مؤكدًا أنها خاضت رحلة طويلة من الدراسة والتجربة واكتساب الخبرات، وأن ما حققته لم يكن وليد الصدفة، مشددًا على أن الحكم الحقيقي في الفن يظل دائمًا بيد الجمهور.

**صورة المخرج عادل أديب من حواره مع الأيام المصرية**

وتحدث عادل أديب عن وعي أميرة المبكر وتعدد خبراتها، قائلًا: “الحمد لله أميرة ذكية جدًا، بتكتشف نفسها، بتشوف نفسها في كل حتة وبتجرب نفسها، ودي خبرات بتكتسبها علشان يوم ما تقف، بمعنى أقف في منطقة معينة، أبقى عندي الخبرات دي كلها، وهي من زمان وهي صغيرة كانت بتغني، بترقص، بتكتب، ودي كانت دراستها بره”.

وأضاف أديب عن دراستها الأكاديمية في الولايات المتحدة، قائلًا: “واخدة أعلى شهادات موجودة بره في أمريكا في الميديا والإنترتينمنت، يعني هي دارسة العالمين: العالم القديم والعالم الجديد، فدي مسألة مش سهلة، وإنك تحصلي على الدرجة دي، وإنك تنجحي فيها، وإنك تبقي موجودة فيها، ومن أعلى الجامعات اللي موجودة بره، دي مسألة مش سهلة".

ورد أديب على الانتقادات التي تتحدث عن “الطلوع المفاجئ”، قائلًا: "الناس كلها بتقول طالعة طلوع شيطاني نافيًا ذلك، لافتًا، هي درست كل شيء، وبتحاول تكتسب خبراتها، وبتعبر عن نفسها بأكتر من أسلوب، وده شيء مهم جدًا إن الإنسان يعرفه".

واستند أديب حديثه قائلًا: «مش ممكن لما يبقى فيه دكتور وابنه طلع دكتور يقولك ده طلع دكتور علشان أبوه، هي نفس النظرية بالظبط، ولكن مشكلتنا بقى في الفن أصعب شوية، ليه؟ يا يتقبلها الناس يا مش هيتقبلوها فلو تقبلوها أهلا وسهلا، متقبلوهاش خلاص، وإحنا النهارده في زمن فيه مشكلة أكبر، إن فيه ناس هتتقبل وناس لا تتقبل، إنت عايش في عالمين في نفس الوقت، ودي كارثة".

واختتم حديثه بالتأكيد على دور الجمهور ونصيحته لابنته ولكل الشباب، قائلًا: “واللي أنا بقوله لبنتي وبقوله لأي حد عايز يعمل أي حاجة، طول ما أنت مستمتع بيها، وشايف إنك بتعملها صح، ودارسها كويس، وفكرت فيها، وأخدت من روحك وحياتك، وفعلا بتحاول تعملها صح، مش مجرد إنك تمسك كاميرا أو ميكروفون وتقول أنا كده فنان أو Chat GPT وAI يطلعني فنان… لا، المسألة مش سهلة، المسألة صعبة، لكن طول ما بتعمل ده لمتعتك الشخصية، أكيد فيه حد هيستمتع بده”.