آسر حمدي يكشف كواليس دوره في فيلم «خريطة رأس السنة» ونصيحة ريهام عبد الغفور (خاص)

تصوير حسين جاميكا

الأربعاء، 24 ديسمبر 2025 07:04 ص

في لقاء خاص مع موقع الأيام المصرية، تحدث الطفل الفنان آسر حمدي، بطل فيلم خريطة رأس السنة مع الفنانة ريهام عبد الغفور، عن دوره في الفيلم، وتجربته الأولى في أداء شخصية تتعامل مع قضية مهمة مثل متلازمة داون، وكواليس تصوير الفيلم في عدة دول، وما تعلمه من زملائه الكبار في العمل، مؤكداً أن التجربة كانت مليئة بالمغامرات والإثارة.

**آسر حمدي يكشف كواليس دوره في فيلم "خريطة رأس السنة"**

تحدث آسر حمدي، عن شعوره عند قراءة سيناريو الفيلم، قال آسر: “أنا جالي ورق وقرأته واستغربت أوي وانبسطت في مشاعر كتير ضربت فيا كده”.

واضاف، قائلا: “أنا الفيلم ده مغامرات في 6 دول في الكريسماس، وبيتكلم عن الداون سندروم، دي أول مرة تحصل، فأنا استغربت، دي أول مرة تحصل في أي فيلم في العالم، دي أول مرة أستاذة ريهام عبد الغفور تعمل دور داون سندروم”.

واستكمل: “كانوا بيجيبوا ناس عندها داون سندروم بجد وبيخليهم يعملوا الأدوار، لكن أول مرة فنانة تعمل دور داون سندروم بنفسها، الفيلم بقى مليء بالمغامرات وفيه أجواء الكريسماس وفيه مفاجآت كتير جدًا وفيه فنانين كتير، وأنا انبسطت جدًا، اخدنا سنة للتحضير، احتجنا إن إحنا نغير شخصياتنا علشان ما نبقاش إحنا خالص، لازم نبين للجمهور إن إحنا ناس تانية".

آسر حمدي: باخد النصائح من ريهام عبد الغفور

وعن تجربته مع الفنانة ريهام عبد الغفور، قال آسر:"خطير بجد، أنا مبسوط جدًا أنا اشتغلت معاها، دي تاني مرة اشتغل معاها، اشتغلت معاها في سينجل فاذر ماذر.

وأنا انبسطت جدًا إن أنا اشتغلت معاها وهي شخصية موهوبة ومحترفة جدًا، عندها خبرة، فأنا دايمًا باخد منها نصايح علشان هي عارفة أكتر مني في التمثيل، طبعا، وأنا عايز آخد نصايح من حد عنده خبرة وجاله كل المشاعر وعارف كل شعور يصوره إزاي، فكنت بجيلها وبسألها أعمل الشوط ده إزاي ويكون أحسن إزاي؟ فبتقولي، وبصراحة باخد بنصيحتها وأول ما أعمل الشوط بيطلع دايمًا حلو وخفيف ويتعمل بسرعة".

وعن الدول التي صوروا فيها، قال آسر: "المجر حبيتها جدًا، علشان أجوائها في الكريسماس كانت خطيرة وفيها حاجات كتير، أنا أول ما روحتها في التصوير استغربت، التصوير ده بيعلمني حاجات كتير بشوف آثار البلاد وبروح المتاحف بتاعتها، فأنا مبسوط جدًا إن أنا اشتغلت في الفيلم ده، لأنها كانت تجربة جديدة عليا".

طقوسه في رأس السنة وأبطاله المفضلين

وعن طقوسه في رأس السنة، أوضح آسر: "بحب أسافر وبحب أجيب هدايا لأخويا ونبسط مع بعض، وسيكرت سنتا كده نخرج ونعزم أصحابي يتفرجوا على خريطة رأس السنة كده".

وعن نجومه المفضلين، قال: "بحب توم كروز جدًا وبحب الأكشن، الوضعية بتاعته بحبها جدًا وأسلوبه، وبأتفرج على كل وضعيات المشاهد، وبحب أحمد عز وحابب إن أنا أشتغل معاه".