مرض تامر حسني ، نجم الجيل يكشف سرا للجمهور بعد نجاح لينا معاد|تفاصيل

مرض تامر حسني، كشف الفنان تامر حسني، عن سرا لجمهوره بشأن حالته الصحية في رسالة وجهها عبر حسابه الرسمي على موقع تبادل الصور والفيديوهات الشهير "إنستجرام" عقب نجاح ألبوم "لينا معاد".

وكتب تامر حسني، قائلًا :"هنتهز الفرصة الجميلة دي إن أغنية الذوق العالي، مع حبيبي اللي بموت فيه الـ King محمد منير، تريند عام رقم واحد، وفي تريند الموسيقى لسه أول يوم أهوه، والـ 13 أغنية بتوع ألبوم لينا معاد في التريند".

 تامر حسنى لجمهوره: مشيت مشوار كبير وعارف إنكم بتحبوني

وتابع تامر حسني، قائلًا :"عايز أقولكم حاجة، عشان كنت أوصل إن ألبومي يدخل التريند كله، وبعيدًا عن التريند يعجبكم كده، أنا مشيت مشوار كبير، أوله إني كنت بقرأ كل تعليقاتكم السلبية قبل الإيجابية، لأني عارف إنكم بتحبوني، وده خلاني أركز وأحلف جوا نفسي إني لازم أفرحكم وأخليكم فخورين بالمجهود اللي عملته".

وأضاف تامر حسني، قائلًا :"تاني حاجة، احترمت ذكرياتكم اللي على صوتي، وتعبت تعب مش طبيعي، ودخلت مستشفيات نص السنة ومش بحب أقول ولا أنزل أخبار من دي".

واستكمل تامر حسني، قائلًا :"يا جماعة أنا بحبكوا أوي، ومن يوم ظهوري وأنا واحد منكم".

وأردف تامر حسني، قائلًا :"عارف إن في ألبومات مكانتش قد توقعاتكم، وإن في ألبومات علامات مش هتتنسي، هي دي الحياة، شوية كده وشوية كده، بس عارف مدى حبكم لألبوم عيش بشوقك، فكان جوايا تحدي واحد بس: إني أتحدى نفسي في عيش بشوقك وأتفوق عليه".

واستكمل تامر حسني، قائلًا :"فضلت أذاكر السوق الغنائي وتغير أنماط الموسيقى اللي أنا بحترمها كلها، وبحترم كل الفنانين اللي نجحوا فيها، فضلت أطور من أدائي، وأذاكر جوا الاستوديو مع مهندسين صوت لمدة سنتين، واجتهد مع الموزعين والملحنين والشعراء اللي بشتغل معاهم في تقديم أجدد شيء". 

وتابع تامر حسني قائلًا :"يمكن زعلوا مني كتير من كتر ما أنا عمال أغير وأعدل وأعيد من أول وجديد، بس دلوقتي فرحتي بالدنيا وهما بيشكروني قدامكم وعلى تليفوني من الإشادات اللي سامعنها منكم في حقهم".

وأردف تامر حسني، قائلًا :"اشتغلت الألبوم ده وأنا جوايا عناد رهيب إن الألبوم كله يعجبكم، أكيد هيكون في تفاوت في الإعجاب، بس المهم إنكم قدرتوا مجهودي والتنوع اللي قدمته في الأوديو والڤيديو".

ووجه تامر حسني، الشكر لمنتقديه قائلًا :"متشكر من قلبي لكل حد نصحني، وكل حد نقدني عشان بيحبني، أنا سمعت كلامكم وتعبت أوي، وانتوا أكيد شايفين، تعبت عشانكم، وعشان برضو أحاول أكون واجهة فنية موسيقية جميلة لمصر، بحكم إني بسافر كتير أغني قصاد العالم، واسمي مطرب مصري عربي".

إقرأ أيضًا

هل فيلم الشاطر ليه جزء تاني، أمير كرارة يفجر مفاجأة |خاص

أول تعليق من بوسي على اعتزال شيكابالا |خاص

واختتم تامر حسني، قائلًا :"شكرًا شركة TH، انتجتوا ألبوم كامل محترم، شكرًا صنّاع ألبوم لينا معاد، وكل الشكر ليكم يا أغلى الناس، ربنا يفرحكم زي ما انتوا مفرحني دلوقتي بكلامكم الجميل".