"صحيت على زغاريد ماما".. الأولى على الشهادة الإعدادية بالقاهرة تكشف سر تفوقها (خـاص)

الخميس، 18 يونيو 2026 04:01 م

حققت رحمة وليد، الأولى على محافظة القاهرة إنجازًا مميزًا بحصولها على المركز الأول في الشهادة الإعدادية 2026، مؤكدة أن النجاح جاء نتيجة جهد كبير ودعم متواصل من أسرتها ومعلميها طوال العام الدراسي.

وقالت رحمة في تصريح خــاص لموقع الأيام المصرية: "في الأول حابة أشكر أهلي طبعًا وكل مدرسيني، وجدي وتيتا على تشجيعهم ليا ودعواتهم ومساعدتهم ليا، وأحمد أخويا طبعًا لأنه كان واثق فيا جدًا، والحمد لله طلعت قد الثقة دي".

كنت نايمة وصحيت على زغاريد ماما.. الأولى على الإعدادية توضح تفاصيل معرفتها النتيجة

وعن لحظة معرفتها بالنتيجة، أوضحت: "بصراحة وقت ظهور النتيجة أنا كنت نايمة، وصحيت على زغاريد ماما وهي بتصحيني وبتقولي: مبروك يا رحمة مبروك يا رحمة".

وأضافت: "في الأول ما كنتش فاهمة أي حاجة، وكنت فاكرة نفسي بحلم، وكنت مصدومة جدًا وبسألها: إيه اللي حصل؟ أنا مش فاهمة حاجة خالص، لكن في نفس الوقت كان جوايا إحساس كبير بالفرحة والفخر بنفسي وإني حققت حلمي أخيرًا".

كنت متوقعة النتيجة بسبب تعبي

وأكدت رحمة أنها كانت تتوقع تحقيق نتيجة متميزة، قائلة: “أنا بصراحة كنت متوقعة النتيجة دي، رغم الصدمة اللي حصلتلي أول ما عرفت، لكن أنا فعلًا تعبت جدًا في المذاكرة، ومن طبيعتي إني ما بحبش أضيع حتى نص درجة”، مضيفة: "كنت متعودة إني أطلع الأولى كل سنة، وده كان دايمًا هدف بحاول أحافظ عليه".

وكشفت الأولى على القاهرة عن أصعب الفترات التي مرت بها خلال العام الدراسي، موضحة: "أصعب وقت كان وقت ضغط الامتحانات والتوتر اللي بيجي لكل الطلبة، وكمان ضغط الدروس والمذاكرة الكتير، وإزاي نوازن بين المذاكرة والراحة ونلحق كل حاجة، كل دي كانت حاجات صعبة بالنسبة ليا، لكن الحمد لله حاولت أتعامل معاها وأكمل".

سر التفوق.. المذاكرة والراحة معًا

وقالت رحمة: "كنت بذاكر ساعتين أو ساعتين ونص، وبعدها أرتاح نص ساعة، وأرجع أكمل تاني بنفس النظام، ما كنتش بركز على عدد ساعات المذاكرة قد ما كنت بركز على الاستفادة والتركيز، وهل أنا فعلًا فهمت واستفدت من اللي بذاكره ولا لأ".

وتابعت رحمة: "أتمنى أبقى مهندسة ديكور، وإن شاء الله أحقق الحلم ده".

الصلاة والدعاء وراء النجاح

وأكدت أن الالتزام بالدعاء والصلاة كان من أهم أسباب تفوقها، موضحة: "كل اللي أنا فيه دلوقتي بفضل الدعوات والصلاة وقراءة القرآن والتحلي بالصبر".

واختتمت رحمة تصريحاتها قائلة: "أنا فخورة جدًا بنفسي إني بقيت الأولى على محافظة القاهرة، وبصراحة ما كنتش متخيلة إني أبقى الأولى على المحافظة كلها، وده كان حلم عظيم جدًا بالنسبة ليا، والحمد لله ربنا حققهولي".

تابع موقع الأيام المصرية عبر تطبيق (تويتر) اضغط هــــــــنا

موقع الأيام المصرية، يهتم موقعنا بتقديم خدمة صحفية متميزة للقارئ، ونقدم لكم خدمة ومتابعة شاملة ومجموعة كبيرة من الأخبار داخل الأقسام التالية، أخبار، رياضة، فن، خارجي، اقتصاد، الأيامTV، حوادث، خدمات مثل: سعر الدولار، سعر الذهب، أخبار مصر، سعر اليورو، سعر العملات ، جميع الدوريات.