تحرش وألفاظ خارجة.. طبيبة امتياز تروي وقائع صادمة داخل قسم النساء والتوليد بمستشفى الشاطبي
شهدت الساعات القليلة الأخيرة حالة من الغضب والجدل الواسع على منصات التواصل الاجتماعي، بعدما تداول رواد ومتابعو الوسط الطبي شهادة حية وصادمة لطبيبة امتياز (أ. س)، فجرت من خلالها مفاجآت مدوية وأسرارًا تنشر لأول مرة حول ما وصفته بـ الانتهاكات الإنسانية والطبية الصارخة داخل قسم النساء والتوليد بمستشفى الشاطبي الجامعي بالإسكندرية.
ونقلت الطبيبة شهادتها الموثقة التي قضت بسببها شهرين كاملين في أروقة المستشفى، مؤكدة أنها كانت أتعس وأسوأ فترات حياتها، حيث رصدت مواقف يندى لها الجبين تعكس حجم العجز وقلة الحيلة أمام ممارسات تفتقر لأدنى معايير الرحمة والإنسانية والمهنية الشريفة.
اعتداءات جسدية وتحرش لفظي وفجيعة التخلي عن ضحايا العنف
تروي الطبيبة (أ. س) تفاصيل أربعة مواقف محفورة في ذاكرتها لا يمكن محوها، قائلة:
"الموقف الأول: واحدة ست بتولد وأول مرة تولد، بنوتة صغيرة عندها ١٩ سنة والدكتور المحترم عشان مصدع من صوتها وهي بتولد عمل إجراء طبي مطلوب وهو فحص فتحة عنق الرحم بشكل أبيوز، وهو عمله اكتر من مرة بطريقة عميقة جدا وعمل تحفيز لمنطقة حساسة يعني اختصارا تحرش بالست وهي بتولد قدامي وقدام التمريض وانا من كتر الصدمة معرفتش أرد وفضلت متجمده لدقايق لحد ما خرج وخرجت وراه وانا بسأله انت ازاي تعمل كده
تجاهلني كأني مقولتش حاجة وطلع يحكي للمغامرة الجنسية دي للممرضات وقالهم عشان تبقى تتمرقع وتصوت وهما بيضحكوا"
وتتابع الطبيبة شهادتها حول الموقف الثاني: ست تانية بتولد الدكتور لطشها بالقلم والممرضة قالتلها جاية تصوتيلنا هنا ولما كنتي بتدلعي مع جوزك كان حلو؟
“انا وزميلتي اتصدمنا وفضلنا نمسك ايد الست وننشفلها عرقها بعد وخدنا تريقة من الدكتور والممرضة إن ياعيني كتاكيت وقلبها خفيف”
أما عن الموقف الثالث،ست جاية ف نايت شيفت اتعرضت لمحاولة اغتصاب وجالها نزيف مهبلي وتهتك ف جدار الرحم وجاية بمحضر رسمي ومعاها امين شرطة؛ الدكاترة المحترمين رفضوا يقدمولها خدمة طبية سواء بصرف حبوب منع حمل طارئة او تحويلها للحميات عشان تاخد الجرعة الوقائية من HIV، ولما اتخانقت معاهم قالولي فكك منها دي "شر* ****" انتي مش شايفة لبسها ولا السجاير اللي معاها ووقفوا يكملوا باقي السندوتشات بمنتهى البرود
وتستطرد في الموقف الرابع: ست جاية بمحاولة إجهاض غير مكتملة وبتدعي انها وقعت وهي شكلها اصلا مضروبة بونية ف عينها يراها أي كفيف والجنين ف الشهر السادس ونازل من بطنها ملفوف بقماشة والحبل السري كله بره جسمها والمشيمة جوه
هل عملوا محضر يثبت واقعة عنف؟ لأ
هل كملوا الاجهاض وعملولها عملية تنضيف رحم؟ لأ
الست دي ف خلال دقايق هيحصلها تسمم حمل والبهوات رافضين يقدمولها خدمة طبية لحد ما تبعت حد يجيب قسيمة جواز لولا اني دخلتها على مسؤوليتي الشخصية وعملتلها التذكرة اللي اتطلب إن يتكتب عليها جملة مهينة _ اشتباه حمل سفاح
ممارسات الوعي الجمعي والبيئة غير الآمنة داخل المستشفى
وفي شقها الثاني من الشهادة، تتحدث طبيبة الامتياز عن ممارسات طبية ومهنية وإدارية وصفتها بالـكارثية، قائلة:
طبعًا مش هتكلم عن إجراء الضغط بالكوع على الرحم لتحفيز نزول المشيمة بعد الولادة عشان معندناش وقت نستنى20 دقيقة لحد ما تنزل طبيعي او عالاقل ندي اوكسيتوسين.
ومش هتكلم عن الجرجرة قدام كشك الولادة ولا رمي الستات بعد ما يولدوا عشان نفضي سرير ولا عمليات شق العجان غير الضرورية ولا عن ما يسمى بغرزة الزوج عشان دي بقت ممارسات متبناه ف الوعي الجمعي.
ولا هنتكلم عن عمليات القيصرية غير الضرورية عشان نلم أقساط شاليه العلمين ولا على الطبيعي بعد قيصري لو الحالة متسمحش عشان أقساط أبراج سموحة عشان دين أم مشاعر أبو مهنة سامية بتتجرح وهو هاتك عرض سامية واللي خلفوها.
وطبعا مش هنتكلم عن المعاملة اللي زي وشهم اللي بيشوفها الامتياز والجونيورز اللي طول الشهرين مشغلينا خدامين عندهم عشان ده ديوتي مش ديرتي.
ومش هنتكلم عن التنمر على أشكال وألوان الأعضاء الجنسية للستات اللي بتولد عشان احنا مش ف النرويج ودي كلها مشاكل عالم أول مقابل كم الحقارة اللي شوفناه.
ولا هنتكلم عن الألفاظ البذيئة اللي اللي مسمعتهاش ف أحقر قهوة بلدي وبيئة العمل غير الآمنة لأي ست عشان دي رفاهيات يا فندم، ومش هنتكلم عن الست اللي شوفتها مهددة بالموت ورافضين يدخلوها عناية عشان حامل غير لما يجيبوا موافقة كتابية من جوزها اللي مسافر الخليج او ابوه او اخواته الرجالة اللي ف الصعيد ورفضوا موافقة أمها عشان مينفعش ست تقرر او كما قال لي السنيور ده الشرع و القانون يا دكتورة ولا انتي من الجماعة الفيمنست هاهاهاها
اقرأ ايضًا: سيدة تتعرض لإصابات بالغة إثر تعرضها لحادث على الطريق الصحراوي بالجيزة
مصرع شاب طعناً بسلاح أبيض أمام مستشفى أوسيم في الجيزة
تابع موقع الأيام المصرية عبر تطبيق (فيسبوك) اضغط هــــــــــنا
تابع موقع الأيام المصرية عبر تطبيق ( الأيام نيوز) اضغط هــــــــــنا
تابع موقع الأيام المصرية عبر تطبيق (تويتر) اضغط هــــــــنا
موقع الأيام المصرية، يهتم موقعنا بتقديم خدمة صحفية متميزة للقارئ، ونقدم لكم خدمة ومتابعة شاملة ومجموعة كبيرة من الأخبار داخل الأقسام التالية، أخبار، رياضة، فن، خارجي، اقتصاد، الأيام TV، حوادث، خدمات مثل سعر الدولار، سعر الذهب، أخبار مصر، سعر اليورو، سعر العملات ، جميع الدوريات.
