"فيها مني وبكيت من قلبي"، فرح الزاهد تكشف تفاصيل شخصيتها في مسلسل روج أسود (خاص)

نجحت الفنانة الشابة “فرح الزاهد” في حجز مكانة مميزة لنفسها ضمن السباق الدرامي الرمضاني الحالي 2026, من خلال تقديمها المتقن لشخصية “حبيبة” في مسلسل “روج أسود” حيث استطاعت بصدق أداؤها أن تعبر عن آلام شريحة كبيرة من النساء اللواتي يواجهن واقعًا قاسيًا وصراعات نفسية مريرة في البحث عن الكرامة المفقودة والأمان وسط علاقات إنسانية مضطربة لتقدم بذلك نموذج درامي حي لصرخات مكتومة تلامس وجدان المشاهدين.

ماذا قالت فرح الزاهد عن دورها في مسلسل روج أسود رمضان 2026

وفي حوار خاص لموقع “الأيام المصرية” تفتح فرح الزاهد قلبها للحديث عن خفايا هذا العمل المستوحى من واقع حقيقي وتكشف لنا عن الرحلة النفسية الشاقة التي خاضتها لتقمص ملامح الشخصية وكيف غلبتها الدموع الصادقة في العديد من المشاهد المؤثرة والطرق التي اتبعتها للفصل بين الوجع الدرامي لحبيبة وحياتها الشخصية بعد انتهاء ساعات التصوير الطويلة والمجهدة وإليكم نص الحوار :

هل "روج أسود" هو صرخة في وجه القوانين اللي ممكن تظلم الست في محكمة الأسرة؟ وإيه الرسالة اللي فرح الزاهد ممكن توصلها لكل بنت بتمر بنفس ظروف حبيبة؟

 "المسلسل بيعرض الواقع زي ما هو ويمكن متجمل شوية كمان عشان الرقابة، لأن الحقيقة أصعب وأبشع بكتير، العمل ده "صرخة" مش في وجه القوانين لأن القوانين موجودة وممكن تجيب الحق، لكنها صرخة في وجه الست اللي ساكتة عن حقها وبتهين كرامتها، لأن معظم الستات بتتهاين مع إن القانون في صفها بس هي مش بتلجأ له أصلاً والرسالة اللي لازم توصل لكل بنت بتتعرض لعنف نفسي أو جسدي في بيت أهلها تحت مسمى "التربية" إن ده غلط ومينفعش تسكتي عليه لأن السكوت بيطلع شخصية ضعيفة وبتحتاج للأمان في علاقات غلط بتدمرها، "ماتستهونوش بكرامتكم"، مد الإيد عمره ما كان تربية، والسكوت مش قوة، القوة إنك تقولي "لأ".

 إيه اللي مخبياه "حبيبة" للجمهور في الـ 15 حلقة اللي جايين؟ هل فيه تحول كبير هيغير مسار الشخصية تمامًا؟

 "طبعاً هيبقي في تحول كبير، وزي ما قلت لك دي قصة حقيقية ولسه فيه أحداث كتير جاية ربنا ما يكتبها على حد، حاليًا حبيبة عايشة "أحلى أيام حياتها" وداخلة في علاقة جديدة ومبسوطة، بس هنشوف إزاي العلاقة دي في الآخر هتوصلها لإيه، للأسف من كتر الإهانة اللي شافتها، حبيبة بتخضع لعلاقات مؤذية جدًا ومهينة وهي مش شايفة قدامها غير بقلبها، لأنها بتدور على الأمان وبس، فيه حاجات لسه هتحصل هتغير حياتها بالكامل، وأتمنى الناس تتعلم منها وتعرف إن الخضوع لأي علاقة لمجرد الاحتياج للحب والأمان بيخلي الست في منتهى الضعف، ف ربنا يستر على حبيبة في اللي جاي".

إيه اللحظة اللي حسيتي فيها إن الورق اختفى وبقت دموع "فرح" هي اللي نازلة مش دموع الشخصية؟ وإيه اللي "لمس" جرح حقيقي جواكِ؟

"السؤال ده خطير، والحقيقة فيه مشاهد كتير الورق اختفى فيها ودموعي نزلت بجد مش تمثيل, فيه مشهد جاي مش عايزة أحرق تفاصيله، بس هتقابل فيه حد من عيلتها اللي هربت منهم، وبتحكي لهم هي ليه عملت كدة؟ وقد إيه نفسها أهلها يصدقوا فيها وفي موهبتها لأن معندهاش فرصة تانية، المشهد ده عملته بروحي لأنه بيمثل ناس كتير موهوبة وبتحاول توصل، ونفسي أهلهم يصدقوا فيهم ويحبوهم بطريقة صح. المشهد ده كان مؤثر جداً ودموعي فيه كانت حقيقية، وزيّه مشهد "الضرب" اللي وجع قلبي على بنات كتير بيحصل فيهم كدة بجد، أنا عشت جوه الكاريكتر وفصلت عن العالم، وحسيت إن حبيبة فيها حتة مني في طيبتها وطموحها وذكاءها، وعشان كدة كنت ببكي عليها من قلبي".

أقرأ ايضًا:-

بكلمات دافئة, راندا البحيري تطمئن الجمهور على مي عز الدين بعد خروجها من المستشفى

رامي وحيد: الجمهور هو من يحدد رقم 1 في مسلسلات رمضان وليس الفنان (خاص)

تابع موقع الأيام المصرية عبر قناة (يوتيوب) اضغط هــــــــــــنا

تابع موقع الأيام المصرية عبر تطبيق (فيسبوك) اضغط هــــــــــنا 

تابع موقع الأيام المصرية عبر تطبيق (تويتر) اضغط هــــــــنا 

موقع الأيام المصرية، يهتم موقعنا بتقديم خدمة صحفية متميزة للقارئ، ونقدم لكم خدمة ومتابعة شاملة ومجموعة كبيرة من الأخبار داخل الأقسام التالية، أخبار، رياضة، فن، خارجي، اقتصاد، الأيام TV، حوادث، خدمات مثل سعر الدولار، سعر الذهب، أخبار مصر، سعر اليورو، سعر العملات ، جميع الدوريات.