عفاف رشاد لـ الأيام المصرية: لم أتوقع العودة لمسلسل المداح وأجلت سفري لـ لندن بسببه

الثلاثاء، 24 فبراير 2026 10:55 م

حققت الفنانة عفاف رشاد نجاحًا كبيرًا في الموسم الثالث من مسلسل "المداح"، حيث جسدت دورها كـ أم صابر “حمادة هلال” بطريقة مميزة جدًا وقوية ونالت استحسان الجمهور ولاقت تفاعل كبيرًا من رواد مواقع التواصل الاجتماعي، حيث أنها تترك أثر كبيرًا في جميع أعمالها.

وكشفت الفنانة عفاف رشاد في تصريحات صحفية لـ موقع "الأيام المصرية" عن كواليس عودتها للمشاركة في الجزء السادس من مسلسل المداح أسطورة النهاية، مؤكدة أنها لم تكن تتوقع العودة مرة أخرى بعد غيابها عن العمل في الأجزاء السابقة.

وقالت في تصريحاتها:"أنا رجعت للمداح في الجزء السادس، وده طبعًا أنا مكنتش متخيلة إني ممكن أرجع تاني بعد مدة في المسلسل، وكانت مفاجأة بالنسبة لي إنهم يكلموني ويفاجئوني بالمفاجأة السعيدة".

عفاف رشاد تكشف عن كواليس ظهورها في مسلسل المداح

وأضافت أنها ظهرت لأول مرة في العمل خلال الجزء الأول كضيفة شرف في الحلقتين الأخيرتين، حيث جسدت شخصية" أم صابر" ، موضحة:"أول ما دخلت المسلسل في الجزء الأول كانوا بيدوروا طول الأحداث على مين هي أم صابر، ومكنش معروف هل الشخصية هيبقى ليها امتداد بعد كده ولا لأ، فكلّموني أكون ضيفة شرف وأعمل أم صابر".

وأشارت إلى أن الدور لاقى تفاعلًا كبيرًا من الجمهور، قائلة:"الحقيقة إن الدور كان عاجبني جدًا، والناس وقتها كانوا عايزين يعرفوا مين أم صابر، لأن صابر في الأحداث لما عرف إن له أم قعد يدور عليها، وكل شوية حد يقوله دي أمك ويطلعوا بيضحكوا عليه لحد ما ظهرت أنا".

وتابعت أن الشخصية أصبحت أكثر أهمية في الأجزاء التالية، موضحة:"الدور كان فتحة خير عليّا، وفي الجزء الثاني والتالت بقيت ضلع أساسي في المسلسل ومن العيلة، لحد ما الشخصية ماتت في الجزء التالت".

عفاف رشاد تعرب عن سعادتها لعودتها لمسلسل المداح

وأوضحت أنها لم تكن تتوقع العودة مرة أخرى بعد ذلك، خاصة أنها غابت عن الجزء الخامس، لكنها فوجئت بالمشاركة مجددًا، مضيفة:
"مكنتش متوقعة خالص إني ممكن أرجع تاني، خصوصًا إني مكنتش موجودة في الجزء الخامس، لكن كانت مفاجأة حلوة جدًا إني أشارك في العمل مرة تانية".

كما كشفت أنها ألغت سفرها إلى لندن بعد عرض المشاركة عليها، ووضحت:"كنت مقررة أسافر لإبني في لندن يوم 15 ديسمبر، لكن لما كلموني على المداح طبعًا لغيت السفر وخليته 15 يناير علشان أشارك في العمل".

عفاف رشاد تتحدث عن أصعب مشهد في المسلسل

وتحدثت الفنانة عن كواليس أحد أصعب مشاهدها في مسلسل المداح، خاصة المشهد الذي تتعرض فيه للقتل على يد ابنتها ضمن أحداث العمل، وقالت:"في الجزء الرابع كنت بظهر لابنتي في الحلم بشكل كابوس، وكنت بهددها لأنها قتلتني، لكن ابني حمادة كان بيشوفني بشكل تاني خالص".

الفنانة عفاف رشاد تتحدث عن كواليس العمل مع هالة السعيد

وأضافت أن مشهد القتل كان من أصعب المشاهد التي قدمتها خلال العمل، موضحة:"المشهد ده كان صعب جدًا بصراحة، والبنت اللي كانت قدامي هي هبة، اللي بتجسدها الفنانة هالة سعيد، وهي ممثلة هايلة جدًا وبتذاكر دورها كويس جدًا"، وتابعت:"هي لما بتيجي تمثل بيكون إحساسها عالي جدًا، وده خلّى المشهد يبقى صعب. أثناء تصوير مشهد القتل كنت خايفة جدًا، وبعدت إيدي شوية، رغم إنهم كانوا ملبسيني درع حديد تحت الملابس علشان الحماية، لكن برضه كنت خايفة على إيدي".

وأوضحت أن المشهد تم التحضير له أكثر من مرة قبل التصوير، قائلة:"جربنا المشهد أكتر من مرة قبل التصوير، ولما صورناه كنت مرعوبة شوية لأن البنت كانت بتمثل بكل طاقتها، فالمشهد كان صعب على الكل".

واختتمت حديثها بالإشادة بفريق العمل، مؤكدة :"الحمد لله المشهد طلع حلو جدًا، وكان معانا مخرج رائع زي أحمد سمير فرج، وكل فريق العمل كان رائع، وده من أحسن المسلسلات اللي أنا بحبها جدًا".

الفنانة عفاف رشاد: طالما بقيتي ممثلة لازم تمثلي كل الأدوار

تحدثت الفنانة عن فكرة ارتباط بعض الأدوار بملامح الممثل، مؤكدة أن التمثيل الحقيقي لا يرتبط بشكل أو ملامح معينة، بل بقدرة الممثل على تقديم مختلف الشخصيات، وقالت:"أنا فعلًا ملامحي طيبة، لكن من رأيي طالما بقيتي ممثلة لازم تمثلي كل الأدوار. عندك مثلًا محمود المليجي، هو كان بيعمل أدوار الشر كتير، لكن في الحقيقة مفيش أطيب منه، إنسان طيب لأبعد الحدود، ومع ذلك قدر يقنع الجمهور إنه شرير الشاشة العربية".

وأضافت:"المسألة مش مسألة ملامحك طيبة، فإزاي تعملي الدور ده. الممثل لازم يكون مذاكر كل الأدوار، لأنك بتمثلي أنماط كتير من المجتمع ومن البشر، ولازم تذاكريها وتشوفيها".

وأوضحت أنها تعتمد في تكوين شخصياتها على ملاحظة الناس في الحياة اليومية، قائلة:"أنا في حياتي بحب أتعامل مع الناس جدًا وبحس بيهم، وبحب أشوف قلوبهم كويسة ولا لأ، وبيتصرفوا إزاي في المواقف الصعبة والسهلة، وكل ده بعد كده بيفيدني في التمثيل"، وتابعت:"حتى طريقة كلامهم سواء صعيدي أو شعبي، دي كلها أدوات بتبقى مهمة بالنسبة للممثل".

وأكدت أنها تحب تقديم الأدوار المركبة والصعبة، مضيفة:"أنا من رأيي الممثل لازم يعمل كل الأدوار، وأنا بحب الأدوار المركبة والصعبة، وكمان بحب الأدوار اللي مش شبه شخصيتي. أنا طيبة، لكن بحب أعمل أدوار شريرة وكوميدية، لكن لو حسيت إن في دور مش هعرف أقدمه بأداء كويس، مستحيل أعمله".