"مش عايزين ترضية، عايزين حق أخويا من المجرم" شقيق المجني عليه يروي كواليس واقعة كفر الأطرش - خاص

حبيبة أبو الفضل

الأحد، 15 فبراير 2026 06:21 م

خيمت حالة من الذعر الممزوج بالحزن على قرية كفر الأطرش والقرى المجاورة لها، في واقعة مأساوية أثارت الخوف أرجاء القرية، حيث تعرض الشاب خالد عوض الله عبد الرحمن، والبالغ من العمر 36 عام إلى الإعتداء عليه بالضرب بكرسي خشبي وإصابته بإصابات قطعية بالرأس ناتجة عن ضربة مباشرة بآلة حادة، دون وجود أي خلافات او معرفه سابقه بينه وبين مرتكب الواقعة.

بداية الواقعة

بدأت أحداث الواقعة في يوم ٢ فبراير الجاري، عندما خرج المجني عليه " خالد " إلى صيدلية في قرية كفر الأطرش لشراء علاج، ليفاجئ عند خروجه من الصيدلية بقيام شاب آخر - لا تربطه به أي معرفة سابقة - بضربه بشدة بكرسي على رأسه، ما تسبب في إحداث إصابات بالغة في الجمجمة والعين أثرت على الرؤية، ولم يكتفي الجاني بذلك فقط، حيث استل من جيبه سلاح أبيض "مطواة" ووجه طعنات وجروح قطعية لرأس الضحية استلزمت حصوله على 7 غرز جراحية بمستشفى شربين العام، قبل أن يفر هارباً بموتوسيكل وسط ذهول المارة.

تصريحات شقيق المجني عليه عن الواقعة

وفي تصريحات خاصة للأيام المصرية قال يوسف عوض الله، شقيق المجني عليه: "رحنا بعدين نعمل بلاغ ف قسم شرطة شربين، ولقينا واحد جاي متعور وقال إن نفس الشخص وقف عربيته وضربه وعوره بس المكان مكنش فيه كاميرات تصور، والواقعة حصلت في نفس اليوم بعد الواقعة الاولى بكام ساعه والعربيه بتاعته متكسره بسبب الواقعة"

شقيق المجني عليه عن الجاني: احنا متأكدين إنه كان شارب مخدرات

وكشف عن تفاصيل تخص المتهم بإرتكاب الواقعة قائلًا: " هو عنده 25 سنه، واللي اعرفه عنه من زمان إنه بيشرب بودره ومشى في طريق الادمان واحنا متأكدين إنه كان شارب مخدرات عشان لما سألنا صحابه لقيناهم بيقولوا انه شخص كويس ومحترم"

إختفاء الجاني بعد إرتكابه الواقعة

وأضاف قائلاً: "المجرم مختفي من يوم الواقعة، ومحدش شافه، ولما سألنا عن أهله، عرفنا إن مفيش غير والدته وهي سيدة منهاره وقاعده لوحدها، وسابت القرية عشان كل شويه المباحث تتواصل معاها بسببه، واخته قطعت علاقتها بيه عشان ضرب جوزها في الفرح"

أسرة المجني عليه ترفض الصلح

كما أكد شقيق المجني عليه للأيام المصرية أن الأسرة ترفض كافة محاولات "الصلح" أو الترضية المادية التي عرضها وسطاء، قائلاً: " احنا جالنا ناس بيقولوا احنا عايزين نزور اخوك وبعدين لقيناهم بيقولولنا شوفوا طلباتكم احنا عايزين نتراضى، احنا مرضيين ومش عايزين حاجه من حد وماشيين قانوني عشان نجيب حقه والموضوع داخل ف ١٥ يوم محدش جاب حقه"

وأكمل قائلاً : "احنا قريتنا كلها اطفال رايحين المدرسة وراجعين من الدروس وخايفين إلا يضرب حد تاني"

وتناشد أسرة المجني عليه المسؤولين بسرعة التدخل وضبط المتهم الهارب، لضمان عدم تكرار جرائمه وحماية أمن المواطنين، خاصة بعد تكرار حوادث الاعتداء التي يكرر إرتكابها.