«متقبل أي قرار ياخده النادي»، رسائل من إمام عاشور في بيان اعتذاره للأهلي وجماهيره

الجمعة، 30 يناير 2026 09:53 م

قدم إمام عاشور، لاعب وسط النادي الأهلي، اعتذاره للنادي ولجماهيره، موضحًا أن حالته الصحية هي السبب في عدم قدرته على السفر مع الفريق إلى تنزانيا لمواجهة يانج أفريكانز.

وكان إمام عاشور، قد تخلف عن السفر رفقة بعثة الأهلي إلى تنزانيا، وقرر الأحمر تغريمه 1.5 مليون جنيه وإيقافه لمدة أسبوعين مع التدرب منفردًا.

وكتب إمام عاشور عبر حسابه على إنستجرام: «للأسف كلام كتير مغلوط وغير صحيح بيتردد بخصوص اللي حصل، وأنا متقبل أي قرار ياخده النادي، وواثق أنه المسئولين في الأهلي هيتفهموا موقفي كويس.. أنا فعلا عندي دور برد جامد ودرجة حرارتي عالية وتقلبات في المعدة بشكل غير طبيعي، وباخد مضادات حيوية. وللأسف كل أسرتي بتعاني من نفس الأعراض.. وأنا بلغت الدكتور أحمد جاب الله بظروفي الصحية وعدم قدرتي على السفر. وده إجراء غير كافٍ في مثل هذه الأمور».

وتابع: «لكن أخطأت بحسن نية وكان المفروض أتواصل مع الكابتن وليد صلاح الدين علشان يبلغ المدير الفني وتتعمل الإجراءات الطبية المتبعة عند التخلف عن السفر.. الموضوع اتقفل خلاص. وتواصلت امبارح بالليل مع الكابتن وليد صلاح الدين. وأنا تحت أمر النادي».

وأوضح إمام عاشور: «جمهور الأهلي سندي وضهري بعد ربنا سبحانه وتعالى. وبعتذر للنادي والجهاز الفني وزمايلي وقبلهم جمهور الأهلي. أنا فخور باللعب في أكبر نادي في أفريقيا. وعلاقتي بجماهيره العظيمة لا تقبل القسمة على اتنين.. وأرجو من الجميع إغلاق هذا الموضوع».

واختتم : «الناس اللي بتقول ان إمام عايز يلوي دراع النادي بقولهم حسبي الله ونعم الوكيل.. محدش يقدر يلوي دراع الأهلي. ولا يمكن أفكر بالطريقة دي أبدا .. وانا اتشرفت بارتداء الفانلة الحمراء وبقالي 3 سنين في النادي. والحمد لله عمري ما قصرت لا في حق النادي ولا جماهيره. وده حقهم عليا. ووجودي في الأهلي نادي القرن وفي ضهري جمهور الأهلي يعوضني عن كل حاجة.. عندنا ماتش بكره مهم. يارب كل التوفيق لزمايلي والجهاز الفني ونحقق الفوز اللي يسعد كل الأهلاوية».

اقرأ أيضًا: