ننشر نص كلمة الرئيس السيسي في كاتدرائية ميلاد المسيح 2026

الثلاثاء، 06 يناير 2026 09:19 م

ينشر “موقع الأيام المصرية” نص كلمة الرئيس السيسي التي ألقاها مساء اليوم الثلاثاء خلال زيارته لكنيسة ميلاد المسيح بالعاصمة الجديدة لتقديم التهاني للبابا تواضروس بابا الاسكندرية وبطريرك الكرازة المرقسية بمناسبة أعياد الميلاد :

بسم الله الرحمن الرحيم.
طب ممكن نقعد بقى عشان أنا هقول لكم كل سنة وأنتم طيبين، ومش عايز أعمل إزعاج لكم أكتر من كده. اتفضلوا استريحوا، اتفضلوا استريحوا لو سمحتوا، اتفضلوا.

بسم الله الرحمن الرحيم.
الحقيقة هي… خلوني أبدأ كلامي بأن أنا أحمد ربنا على إن إحنا إن شاء الله منذ عام 2015 وإحنا بنيجي نحتفل مع بعضنا بالعيد. بهني قداسة البابا، وبهنّي الكنيسة، وبهنّي كل المواطنين أهلنا المسيحيين والمصريين وكل الناس اللي في العالم. كل سنة وأنتم طيبين، وعيد سعيد علينا كلنا، وربنا يحفظنا ويجعل دايمًا أيامنا كلها أعياد وأفراح، اللهم آمين.

كنت بقول إن إحنا في 2015 كان أول مرة أتشرف بالزيارة دي، واحتفل وأشوف المحبة اللي بينا. المحبة اللي بينا، وفي الفترة من 2015 للنهارده حصل حاجات كتير، وأحداث كتير، وأيام صعبة كتير، لكن كل مرة أنا بقول الكلام ده إن إحنا بنقول إن كل ما يكون شعب مصر كلنا مع بعض، بنحب بعض، بنخاف على بعض، بنحترم بعض.

الرئيس السيسي: ما تسمحوش لحد إنه يتدخل بينا

وما نسمحش، مش هقول لحد، ما نسمحش لأنفسنا أبدًا إن علاقتنا كشعب مصر بلا أي تمييز تفضل علاقة طيبة، ونحافظ عليها ونطورها ونعزها. هو ده الرصيد اللي إحنا لازم نخلي بالنا منه ونحافظ عليه، وما نديش فرصة لحد أبدًا إن يتدخل بينا. مش عايز أقول بينا، لا ما فيش بينا، ما فيش إنتوا وإحنا، ما فيش إنتوا وإحنا، في إحنا، إحنا كلنا واحد.

كل مرة أقول لكم الكلمة دي، وعشان مرة تانية بقول لكم إن قداسة البابا له تقدير خاص في نفسي واحترام شديد جدًا لشخصه العظيم، وليكم كلكم، وربنا يحفظكم وربنا يحفظكم ويحفظ بلدنا.

ومش عايز آخد الوقت بتاع قداسة البابا من بدري، ويعني حرام عليكم. عام سعيد، عام سعيد، عام سعيد عليكم وعلينا كلنا وعلى الدنيا كلها. ونقول يا رب إن العام ده، ونقول يا رب إن 2026 يبقى عام بفضل الله أفضل علينا وعلى كل الدنيا.

وصية الرئيس السيسي للمصريين من الكاتدرائية

وبقول للمصريين: أوعوا تقلقوا أبدًا، أوعوا تقلقوا أبدًا، بس بشرط خليكوا دايمًا مع بعض، خليكوا دايمًا مع بعض، وأوعى حد يحاول أبدًا يخلينا نختلف أو حتى نأذي نفسنا وبلدنا. دي وصيتي ليكم، لينا كلنا.

أي مشكلة بفضل الله سبحانه وتعالى بتتحل، بس تفضل مصر بخير وسلام، وشعبها بخير وسلام. مرة تانية مش عايز أطول عليكم، كل عام وأنتم بخير وسلام وسعادة، وقداسة البابا بخير وسلام وسعادة. وإحنا بنبقى فرحانين قوي وإحنا موجودين معاكم، وربنا يفرحكم دايمًا ويفرح مصر ويفرح الدنيا كلها، اللهم آمين.

كل سنة وأنتم طيبين، كل سنة وأنتم طيبين.
متشكر جدًا.

إقرأ أيضا :