"أخدت معايا سكينة بس مكنتش قاصد اقتلهم" أقوال المتهم بقتل زوجته بالمرج

الثلاثاء، 16 ديسمبر 2025 08:22 م

أحال المحامي العام الأول لنيابة شرق القاهرة، المتهم م ع علي المعاش إلى محكمة الجنايات لاتهامه بقتل زوجته والشروع في قتل ابنته واستمعت النيابة إلى أقوال ابنة القاتل وإلى أقوال الأب المتهم.

س: ما تفصيلات إقرارك؟
ج: اللى حصل إني متزوج من الست دي وانجبت منها بنتين ولحد السنة اللى فاتت كان في بينا خلافات زوجية عادية لحد شهر فات ، حصل بينا مشكلة وخلاف بسببه ضربتها وهى غضبت واخوها خدها عنده لمدة عشرة أيام وبعد كده بنتي الكبيرة خدتها تقعد عندها وانا من ساعتها بحاول ارجعها واصلح الأمور ولكن رافضة وطالبة الطلاق وكانت بتسخن ولادها عليا لحد في يوم كنت قاعد مع صاحب العمارة اللى انا قاعد فيها وقابلت بنتي وحاولت اعقلها واقنعها تخلى امها ترجع البيت وكانت ماسكه في ايديها كيس شيبسي فيه أكل راحت ضربتنى بيه على دماغى وعورتني ، وانا رحت عملت محضر في قسم عين شمس ، ومن ساعتها وانا قاطع معاهم علاقتي بيهم ما عدا حفيدى ابن بنتي عشان هو متعلق بیا وانا بحاول اشوفه واتواصل معاه ، ولكن أمه وزوجتى منعونى انى اشوف حفيدى سواء في المدرسة او في البيت وفضلت على الحال ده لحد مدة قريبة

المتهم يحكي ملابسات يوم ارتكاب الجريمة

لحد ما في يوم قررت انى اروحلهم البيت أتكلم معاهم في الوضع ده وقولت أأمن نفسى وخدت معايا من البيت سكينة وحطتها في شنطة يد وطلعت على هناك وأول ما طلعت الشقة لقيت بنتي فتحت الباب وأول ما شفتنى صرخت في وجهي وقالتلي انت ايه اللي جابك هنا ومسكوني وحاولوا يعتدوا عليا وفى اللحظة دى طلعت السكينة وبدأت أضرب في اللي حواليا والضربات الأولى جت في بنتى وبعدها مراتي هجمت عليا لما شافت بنتى بتضرب وحاولت تتعدى عليا رحت ضاربها بالسكينة بس مكنتش اعرف انا بضرب فين وجريت على البلكونة وقعدت تصرخ عشان تلم الناس عليا رحت انا دخلت وراها وجبتها دخلتها جوه وكملت عليها لحد ما مراتى وقعت على الأرض بس بنتي كانت لسه واقفه على رجليها وفى اللحظة دى كل السكان دخلوا عليا الشقة ومسكونى وكتفونى ونزلوا فيا ضرب لحد ما الإسعاف جت والشرطة اخدتني على قسم المرج وهو ده كل اللى حصل.

نص أمر الإحالة

جاء بأمر الإحالة أن المتهم قتل زوجته المجني عليها عمدا مع سبق الإصرار بأن بيت النية وعقد العزم على قتلها بسبب خلافات زوجية بينهما فأعد لذلك الغرض السلاح الأبيض محل الاتهام الأخير وقصد محلاً أيقن تواجدها فيه وما إن ظفر بها حتى سدد إليها طعنات استقرت بمواضع قاتلة من جسدها قاصدًا إزهاق روحها فأحدث بها الإصابات الموصوفة بتقرير الصفة التشريحية المرفق والتي أودت بحياتها.

كما اقترنت بتلك الجناية، جناية أخرى هي أنه في ذات الزمان والمكان سالفي الذكر شرع في قتل ابنته المجني عليها عمدا مع سبق الإصرار بأن بيت النية وعقد العزم على قتلها إثر مناصرتها لوالدتها المجني عليها الأولى في خلافها معه ، فأعد لذلك سلاحا قاصداً مسكنها حال تواجدها في معية المجني عليها الأولى.

تفاصيل مقتل زوجة علي يد زوجها بالمرج

كانت منطقة المرج بمحافظة القاهرة شهدت حادثًا مأساويًا، عندما أقدم رجل يبلغ من العمر 60 عامًا على قتل زوجته والشروع في قتل ابنته بسكين، نتيجة خلافات زوجية متكررة.

ووفقًا للتحقيقات، توجه المتهم "محمد.ع" إلى زوجته "رضا.أ" وما إن اقترب منها حتى طعنها في البطن والظهر والحوض، ما أدى إلى وفاتها بسبب النزيف.

ولم تتوقف الجريمة عند هذا الحد، إذ شرع المتهم في قتل ابنته "ندى.م"، حيث باغتها عند فتح الباب ووجه لها 9 طعنات في الرقبة والبطن والظهر والساقين، قبل أن يتدخل الأهالي وينقذوها وينقلوها إلى المستشفى لتلقي العلاج.

أكد شهود الواقعة أن المتهم كان قد أعد السكين مسبقًا وكان يسعى لارتكاب الجريمة عمدًا، مشيرين إلى أنه اعتاد الإساءة لزوجته وابنته سابقًا.

واعترف المتهم أمام جهات التحقيق بارتكابه الواقعة، موضحًا أن خلافاته الزوجية المستمرة كانت سبب تحركه نحو الاعتداء على الضحيتين، وتم ضبط السلاح المستخدم معه.