عمرو سلامة يدافع عن فيلم السلم والتعبان 2: انتقد لكن متقولش منع

الإثنين، 17 نوفمبر 2025 02:47 م

انتقد المخرج عمرو سلامة الهجوم الذي طال صناع فيلم السلم والتعبان 2، لما يتضمنه العمل من مشاهد وألفاظ جريئة.

وكتب سلامة عبر حسابه الشخصي على موقع التواصل الاجتماعي الفيسبوك: "موافق على الانتقاد لكن رافض تمامًا طلبات المنع والمعاقبة ،طالما قدمت شغلك للجمهور، زي ما أنت عايزه يدفع فلوس، وزي ما أنت مستني إعجاب، يبقى لازم تبقى مستعد تتحمّل النقد مهما كان لاذع أو قاسي، لكن الناس اللي عايزة تمنع عمل، أو تعاقب صناعه علشان حاجة مش عاجباهم، أو علشان بيحاكموا العمل بأخلاقياتهم الشخصية دول في الحقيقة بيضرّوا نفسهم قبل أي حد.

وأضاف : لأن بكرة لو طلع عمل بيعبر عنهم ويمثلهم، ممكن طرف تاني مختلف أو محافظ أكتر يشوف نفسه مهدد، فيطلب هو كمان منعه.وده معناه إن الفن يبقى ماسخ ما يناقشش حاجة حقيقية، ما يمثلش أي فئة، ولا يزعّل حد. يبقى مجرد حشو شاشات وسماعات، يعني يبقى المفروض العمل ياخد موافقة الشعب كله قبل ما يتعرض ، ولو أكتر شخص متطرف فكريًا ماعجبوش، يتشال من الوجود.

تابع : أنا فاهم وجهة نظر اللي شايف إن الشتيمة مش إنجاز ولا حرية ولا جرأة بس دعمك للمنع بيفتح باب يتمنع من خلاله أي جرأة تانية، أي نقاش حقيقي، أي صرخة من مظلوم.إفتح أي فيلم محترم من التسعينات واسأل نفسك:
هل الفيلم ده كان ممكن يتعمل النهاردة؟ بنسبة ٩٠٪ لأ.

واختتم : قريب شفت الخماسية العظيمة لعادل إمام ووحيد حامد وشريف عرفة (مع حفظ الألقاب) ، وسألت نفسي: هل أي فيلم فيهم ممكن يتعمل النهاردة؟ أقولك؟ هل أي عشر دقايق في أي فيلم فيهم يتعملوا النهاردة؟لو وافقت إن اللي واقف يمينك يتخرس… يبقى اللي واقف شمالك من حقه يخرسك انت كمان. وفي الآخر، بحيي النقابة وبادعمها على سماحها لأي حاجة مختلفة… حتى لو مش على مزاجي ولا على مزاجها.وضد المنع أي منع.
في زمن كل حاجة فيه متاحة، المنع بقى نكتة… منطق قديم، ديناصوري، وعطن.

فريق عمل فيلم السلم والتعبان لعب عيال

يشارك في بطولة الفيلم مجموعة كبيرة من النجوم أبرزهم عمرو يوسف، أسماء جلال، ظافر العابدين، ماجد المصري، حاتم صلاح، فدوى عابد، هبة عبد العزيز، وآية سليم، فيما تظهر الفنانة القديرة سوسن بدر كضيفة شرف خاصة تضيف ثقلًا وتميزًا للعمل السينمائي المنتظر ، الفيلم من قصة وإخراج وإنتاج المخرج الكبير طارق العريان، وشارك في كتابة السيناريو أحمد حسني، فيما يتولى الإنتاج موسى عيسى.