شيكابالا: أبو تريكة كان مرعب ودلوقتي اللي أبوه غلبان مش هيلعب كورة

الأحد 02/نوفمبر/2025 - 02:36 م

تحدث محمود عبدالرازق شيكابالا لاعب الزمالك السابق وأحد اساطير القلعة البيضاء، عن أسباب تراجع الكرة المصرية والفرق بين جيله والجيل الحالي من اللاعبين.

شيكابالا: أبو تريكة مرعب بالكورة.. واللي مش معاه فلوس مش هيلعب

قال شيكابالا في تصريحات تلفزيونية: «لعبت مع لعيبة جامدة جدًا في التمرينات، بس تيجي تشوفهم في الماتشات تلاقيهم ناس تانية، مبيعرفوش يباصوا ومش قادرين يستحملوا الضغوط».

وأضاف: «أنا لعبت مع جيل بركات وأبو تريكة ووائل جمعة، ده كان جيل رهيب وليه شخصية جوه الملعب، وأبو تريكة كان مرعب مرعب بالكورة جوه الملعب».

وعن سبب تراجع الكرة المصرية قال: «المشكلة دلوقتي إن الموهبة في مصر قلت في الفترة الأخيرة، عشان الكورة بقت مقلوبة، اللي أبوه غلبان وفقير خلاص مبقاش يلعب كورة، بس اللي معاهم فلوس هما ولادهم اللي بيلعبوا.

وواصل: «الناس دلوقتي مش بتاخد بالموهبة، بتاخد انت هتدفع قد إيه! وده مأثر على الناشئين في الأندية، بُص للنادي الأهلي مثلًا، هتلاقي بيلعب 3 ناشئين في الفريق الكبير، ده لو بيلعبوا أصلاً. وبُص للزمالك برضو، نفس الكلام، مفيش ناشئين بيلعبوا».

وأكمل: «الموهبة قلت عشان مفيش زي زمان، كانوا بيعملوا اختبارات كبيرة وتلاقي ناس جاية من الصعيد أو من الريف ويستحقوا يلعبوا في الأندية، بس دلوقتي مش موجودين عشان معهوش فلوس، الكورة دلوقتي بقت فلوس حتى في الناشئين».