هبطل ألعب، القصة الكاملة لـ أزمة شروق وفا لاعبة الشطرنج

شنت شروق وفا لاعبة الشطرنج وبطلة إفريقيا هجومًا حادًا على مسؤولي الاتحاد المصري للشطرنج، بسبب بعض المواقف التي تعرضت لها خلال الفترة الماضية.

وأعلنت لاعبة الشطرنج شروق وفا عن اعتزامها القيام بإجراءات تغيير الاتحاد الذي تمثله في لعبة الشطرنج من مصر إلى أيرلندا، في ظل مواقف مسؤولي الاتحاد المصري للعبة.

شروق وفا: هبطل ألعب شطرنج باسم مصر

قالت شروق وفا عبر حسابه الشخصي بموقع التواصل الاجتماعي «فيسبوك»: «الناس القريبين مني كلهم عارفين ان هبطل العب شطرنج بإسم مصر وبدأت خطوات تغيير الاتحاد لأيرلندا، طبعا بعد تحقيق أكتر من 20 ميدالية ذهبية للبلد على مدار 15 سنة، ومكنتش ناوية اقول الأسباب في العلن بس الاتحاد المصري للشطرنج مصمم في الانحلال وقلة الأدب فانا هنزلها».

وتابعت بطلة لعبة الشطرنج: «هو فيه اتحاد محترم ينزل مقال زي ده عن لاعب محققله بطولات المفروض يكون بيشجعه؟ والبطولة اللي قايلينها كمثال اللي هي العرب في المغرب هما مبلغين ان حامد مش هيسافر من قبلها أصلًا وهو فارق في الريت عن زمايله ساعتها، وحامد طلع الرابع تحت 20 وديفيد تحت 18 مش نفس البطولة، وديفيد واخد منها IM مش محتاج اللقب ولا حاجة واحنا سكتنا ومكتنباش حاجة بس بيكذبوا عاادي».

وأضاف: «وده طبعًا حصل بعد المهزلة بتاعة كأس العالم سيدات اللي نائب رئيس الاتحاد الأستاذ جورج رفض يطلعلنا قرار وزاري على أساس إن فيها جوايز مالية فا عادي اطلعوا على حسابكوا، ووقفنا في المطار مكناش هنعرف نسافر عشان جورجيا محتاجة تصريح أمني أو قرار وزاري ومسافرناش إلا لما غيرنا التذكرة على السعودية».

أزمة شروق وفا لاعبة الشطرنج

وواصلت: «وقبلها بطولة أفريقيا (أنا اللاعبة الوحيدة اللي خدتها 5 مرات) مدير البطولة كريم وجيه كل جولة كانت بتتأخر من ربع لتلت ساعة على ما ضيوف يجوا يعملوا النقلة الافتتاحية، وفي يوم اتأخرنا عشان باباه يتصور الصورة دي، وأما في يوم بقى حصل حادثة في الطريق وكنا 3 لاعبين منتخب هنخسر بالانسحاب بلغناه ورفض يأجل الجولة وسبحان الله اليوم الوحيد اللي يبدأ في معاده وكان بيأجلها عشان لاعبين تانيين عادي، والبطولة كانت هتضيع مني بسبب كده أساساً عشان وصلنا قبل الانسحاب بدقيقتين بس عااادي المهم هو وأهله يتصوروا في الحفلة».

وأردفت شروق وفا: «وقبلها بطولة الزون في نيجيريا اللي بتأهل لكاس العالم والGrand Swiss واتأهلتلها كأعلى تصنيف في القارة، نائب رئيس الاتحاد وعدني بتغطية التكاليف ولما تعبت هناك وجالي تيفويد ومتوفقتش طبعا قالي خلاص مانتي مجبتيش مركز هنكلم الوزارة نقولهم ايه ومرجعش أي تكاليف».

شروق وفا: إداريين الأولمبياد ضرهم أكثر من نفعهم

وزادت: «واتأهلنا بعد الأوليمبياد لكاس العالم قارات اللي مفيش غير 10 دول في العالم بتلعبه والاتحاد رفض يطلعنا برده عشان ميدفعش 1000 يورو اشتراك، ولا الأوليمبياد نفسها أصلًا اللي من 15 سنة بيطلع معانا إداريين يضرونا أكتر ما بينفعونا (دي عايزة بوست لوحدها والله)، وكل ده وعمري ما كتبت حاجة وكنا بنحاول نتفاهم معاهم وديًا بالكلام بس من غير أي فايدة لحد ما خدت القرار ان مش هلعب مع المنتخب تاني، بس خلاص فاض الكيل».

واختتمت: «المنظومة أساسا غلط عشان لو منصب مفيهوش مرتب فا مفيش حد أكيد فاضي يتطوع، ومش هيدخل فيه الا لو بيطلع منه مصالح، بس مستوى الانحطاط الحالي غير مسبوق ولا يشرفني أن أمثل مصر مع وجود الاتحاد الحالي، وبالتوفيق». 

تابع موقع الأيام المصرية عبر قناة (يوتيوب) اضغط هــــــــــــنا

تابع موقع الأيام المصرية عبر تطبيق (فيسبوك) اضغط هــــــــــنا

تابع موقع الأيام المصرية عبر تطبيق (تويتر) اضغط هــــــــنا

موقع الأيام المصرية، يهتم موقعنا بتقديم خدمة صحفية متميزة للقارئ، ونقدم لكم خدمة ومتابعة شاملة ومجموعة كبيرة من الأخبار داخل الأقسام التالية، أخبار، رياضة، فن، خارجي، اقتصاد، الأيام TV، حوادث، خدمات مثل سعر الدولار، سعر الذهب، أخبار مصر، سعر اليورو، سعر العملات ، جميع الدوريات.