محمد ثروت وزوجته وأولاده، الفنان يفشي سرا عن حياته الشخصية (فيديو)
محمد ثروت وزوجته وأولاده، كشف الفنان محمد ثروت، عن جانبًا من حياته الشخصية، قائلًا :"بعد ما خلصت كلية التجارة بعد سبع سنين من الاجتهاد والتعب، كانت فترة السنتين اللي قبل وفاة والدي، كنت بمثل في فرق حرة، زي فرق مسرح الدولة، وفرق حرة تانية بتشارك في مهرجانات مهمة مثل مهرجان الساقية والمهرجان القومي للمسرح، وكمان في فرق بوسط البلد".
وأضاف محمد ثروت، قائلًا :"كنا بنشتغل فيهم بدون مقابل، وأحيانًا بنصرف على الديكور والملابس من جيوبنا الخاصة، لكن كل ده كان بنعمله بشغف وحب كبيرين، الناس كانت بتقول علينا إننا كويسين، وإننا بنعرف نمثل مش علشان نتمشى على طريق الشهرة أو عشان نكسب فلوس، لكن علشان نثبت للناس إننا فعلاً بنعرف نمثل وإن دمنا خفيف وإن عندنا موهبة حقيقية".
وتباع محمد ثروت، قائلًا :"واتعلمت حاجة مهمة جدًا، من خلال التجربة دي، وهي إن الشغف وحب العمل بحد ذاته ممكن يوصلك لأماكن ما كنتش متخيل إنك تقدر توصلها. طول ما انت بتحب شغلك، أكيد الشغل هيديك أكتر مما بتديه هو ليك".
واسترجع محمد ثروت، موقفًا أيام الجامعة، قائلًا :"في فترة الجامعة، تعرفت على الجميلة منى، اللي كانت زميلتي في فريق التمثيل بجامعة عين شمس. منى مش بس زوجتي الآن، لكنها كمان شريكة حياتي ومديرة أعمالي، وده بفضل تعاونها الكبير ودعمها المتواصل لي".
وأردف محمد ثروت، قائلًأ :"العلاقة بيني وبين منى بدأت كزمالة عمل في التمثيل، وكنا بنعمل مع بعض تمارين وورش في الفرق الحرة. خلال فترة الجامعة، منى كانت مشهورة بجمالها وأناقتها، وكانت مسؤولة عن استقبال اللجان والأساتذة في العروض المسرحية، وكانت واجهة الجامعة بكل جدارة".
وأوضح محمد ثروت، قائلًا :"في أحد عروض الجامعة، حصل موقف بسيط لكن ترك أثر كبير، لما ما كانش فيه كرسي فجلست في الصف الأول جنب منى، وده كان بداية شرارة العلاقة بيننا. على مدى ثلاث سنوات، بدأت نتكلم ونتعرف على بعض بشكل أعمق، رغم إني في البداية ما كنتش مركز قوي على فكرة الزواج أو الحب، لأني كنت مركز على تحقيق أحلامي وطموحاتي، وكنت مقتنع إن ما ينفعش أربط حد بيا في الوقت ده".
وأكمل محمد ثروت، قائلًا :"بس في النهاية، منى هي اللي اعترفت بحبها لي أول، وده خلاني أبدأ أقبل المشاعر دي، بالرغم من كل التخوفات اللي كانت عندي، واللي كنت بحاول أخفيها، قلبنا اتحكم فينا، وقررنا نرتبط".
وأكمل محمد ثروت، قائلًا :"أنا دايمًا كنت بقول لها، أنا قدامي مشوار طويل، وأنا مستنيك وأنتِ دايمًا الدعم والسند، وفعلاً، هي كانت الدعم الحقيقي ليا، وبتدير أعمالي بشكل رائع، والحمد لله كونّا أسرة جميلة وعندنا ثلاث أولاد، أكبرهم سليم، وهو موهوب جدًا وبيمثل في المدرسة، وشارك معايا في فيلم اسمه "كابتن جاك"، اللي لسه ما نزلش بعد، وسليم عنده موهبة فنية واضحة، بيغني وبيرقص، لكن لسه ما بلورش موهبته بشكل كامل، ولسه بنكتشف معاه طريقه الحقيقي.
