محمد نور: بشوف صحابي بيموتوا من صغري ومقدرش أعمل حاجة بدون ماما

حل الفنان محمد نور ضيفًا على بودكاست "كلمة السر" الذي تقدمه الإعلامية رانيا حكيم، في حلقة اتسمت بالصدق والعفوية، كشف خلالها عن جوانب إنسانية من حياته الشخصية والمهنية، وأجاب على أسئلة طالما طرحت حول علاقاته، ومواقفه، وتكوينه النفسي داخل بيت فني أصيل.

"أنا شكلي بيخدع.. اللي يعرفني عن قرب بيشوف إنسان تاني"

كشف محمد نور في اللقاء عن اختلاف الانطباعات الأولى عنه، موضحًا:"اللي يعرفني كويس بيشوف حاجة تانية خالص عن شكلي، الكل بيقولي إني طيب وبحب الناس، بس اللي ميعرفنيش بياخد فكرة غلط في الأول".

وفي وصفه لطباعه داخل الوسط الفني، قال نور:"في شغلانتنا بنسمع كتير عن مين سافر، مين نزل بوستر، مين صور حفلة أكبر، بس أنا بعيش بعيد عن كل ده… بفرح من قلبي لأي حد ينجح، ودايمًا أول واحد يبعتله مبروك".

البحر.. وأمي.. مكانين بحس فيهم بالأمان

عن الأماكن التي يجد فيها الراحة النفسية، أجاب الفنان:"أنا بحب البحر جدًا، خصوصًا في جدة… المية بتخليني أفكر في كل حاجة، وبحب أقعد في البيت لوحدي كإني وسط عيلتي".

وتابع حديثه المؤثر عن والدته:"مقدرش أعمل حاجة من غير ما أكلم ماما، هي ساكنة في نفس البيت، بس تحت… لما أنزل أو أطلع لازم أطمن عليها… وجودها طمأنينة وكلمة السر في حياتي دعوة أمي".

"أنا خوفي من الموت قديم.. وخسرت ناس كتير صغيرين"

وعن أسباب قلقه المبالغ فيه على من يحبهم، قال نور:"من وأنا صغير وأنا بشوف صحابي بيموتوا، التجربة دي سيبتلي أثر مرعب… الموتوسيكلات دي أكتر حاجة مخوفاني، وأي حاجة فيها انذار بربطها بالموت".

في واحدة من أكثر اللحظات صراحة في الحوار، علق محمد نور على ما أثير حول توثيقه جنازة والده: "أنا مصورتش ولا وثقت الجنازة… كنا في عز أزمة كورونا، ومفيش فلوس، ومفيش شغل، والدي كان أقرب حد ليا وكان مريض جدًا آخر 6 شهور… لما مات أنا كنت مش مستوعب، وقعدت حوالي 20 يوم مش مصدق".

وأضاف : "بابا عمره ما زعقلي، كان أطيب إنسان، وأنا دلوقتي لما أزعق لعيالي أو أضربهم بفتكر إنه عمره ما عمل كده فيا".