أنا زرت الكينج، دعاء فاروق تتحدث عن لقائها الأول مع محمد منير

أعربت الإعلامية دعاء فاروق عن سعادتها للقائها الأول مع   الكينج محمد منير، مقارنة شعورها بهذا اللقاء بنفس الصوت الشهير لكارتون مارد وشوشني وهو يقول "أنا طلعت في التليفزيون"، وتحدثت عن الصدفة التي جعلتها تزور الكينج بإذن شخصي منه.

دعاء فاروق تعرب عن سعادتها لمقابلة الكينج محمد منير

وشاركت الإعلامية دعاء فاروق متابعيها عبر حسابها الرسمي على موقع التواصل الإجتماعي فيس بوك، مجموعة صور من زياراتها للكينج محمد منير في منزله برفقة مجموعة من صديقاتها، إحداهن من المقربين للفنان محمد منير.

وكتبت دعاء فاروق نصًا: " على غرار الصوت الشهير اللي بيقول أنا طلعت في التلفزيون.. أنا ممكن اعمل صوت بنفس الانبساط والدهشة بيقول أنا زورت الكينج محمد منير في بيته".

وكشفت دعاء عن سبب اللقاء وقالت: “وعشان متحتاروش وتقولوا ايه اللي جاب القلعة جنب البحر الموضوع ببساطة إن ريهام ابراهيم صديقتي الجميلة كانت بتزورني امبارح للاطمئنان علي ديدو ابني وفي وسط القعدة تركتها ودخلت المطبخ، وإذا بروكي بنوتي جت تقولي الحقي يا ماما ده ريهام بتكلم محمد منير في التليفون عادي،  قلت لها اه يا روكي ما ريهام من أصدقائه المقربين جدا منذ سنوات طويلة ودخلت علي ريهام وقلت لها كواحدة مصرية أصيلة ممكن تحشر نفسها في مكالمه لا تخصها بتاتا سلميلنا عليه يا ريهام وقوليله ان كلنا بنحبه …”.

واستكملت: "واعتقد ده العادي بتاع أي كائن مصري سامع صوت محمد منير طالع من السماعة اللي جنبه، فإذا بريهام تقول له طب خد دعاء فاروق عاوزة تكلمك  وكانت مفاجأة لطيفة لأنه لطيف جدا جدا لدرجة اني لما بقول له علي فكرة جوزي بيحب يسمعك جدًا وفعلًا هو مطرب عماد المفضل قال لي بمنتهي اللذاذة ( الله الله ) خلصت المكالمة بكلمات الثناء اللطيفة وانهيتها  بإن شاء الله تيجي فرصه واشوف حضرتك قريب فكانت المفاجأة أنه قال لي اتفضلي نوريني مع ريهام بكرة ".

واختتمت دعاء فاروق منشورها وكتبت نصًا: " نجم كبير وقيمة كبيرة وعلي قدر نجوميته علي قدر تواضعه ولطفه الشديد في استقبالنا وفرحت جدًا لما قال لي انه اتفرج عليا النهارده الضهر في برنامجي".