ترانيم المداح.. المؤلف أسامة محرز يوضح معانيها والفكرة من صعوبة فهمها (خاص)
ترانيم المداح، ربط مسلسل المداح علاقة قوية مثيرة للاهتمام من قبل الجمهور، بسبب ترانيم مسلسل المداح ، التي يتداولها رواد السوشيال ميديا وجمهور مسلسل المداح، بشكل مثير للجدل فبعضهم ينظرون لها بأنها إشارة لوجود الجن وتسبب حالة من الرعب، والبعض يعتبرها موسيقى مشوقة مع كلمات متنغمه دون الالتفات لمعاني كلمات ترانيم المداح، ومن حين لآخر تظهر البوستات التي تشير إلى أنها طلاسم خاصه بالجن.
فكان لموقع الأيام المصرية حوار خاص مع المؤلف أسامة محرز ، مؤلف ترانيم مسلسل المداح، ليكشف لنا السبب وراء اختيار كلمات صعبه في ترانيم المداح ، ومعاني كلمات الترنيمة الأشهر للجزء الخامس وهي ترنيمة بالك مندار.
المؤلف أسامة محرز : لازم الكلام يليق أنه يكون رسالة من الجن
وضح المؤلف أسامة محرز عن سبب اختيار كلمات صعبة لترانيم المداح، وقال "هو المطلوب من الترانيم أن يكون كلماتها جديدة على ودن اللي بيسماعها، يعني مش مطلوب صعوبة، قد ما يكون مختلف عن طريقة الكلام العامية، لأن إحنا لو عملنا كلام عادي أو تكلمنا بالعاميه يعني مش هيبقى في مصداقيه أنه ده جن، هي الترانيم ده رسالة وكلام على لسان الجن بيوصلها لبطل مسلسل المداح، أو للإنسان عموماً ، يعني فأنا لو عملت الجن بيتكلم لغه عاميه زي ما احنا بنتكلم انت مش هتحس بفرق هتحس انه جن يعني هتحس أنه بني آدم عادي".
واستكمل قائلًا: "بناء على فكرة أن الكلام ده بيكون رسالة من الجن ، فاحنا من السنه اللي فاتت أخذنا قرار أنه لازم الكلام يبقى غريب شويه ولازم الناس تدور على معناه شويه".
سبب اختيار اللهجة الصعيدي في ترانيم المداح
وتحدث عن سبب اختيار اللهجة الصعيدي لكتابة كلمات ترانيم المداح، قائلًا: "تم اختيار اللهجة الصعيدية ، علشان الكلام الصعيدي بيبقى فيها كلام قديم شويه حتى يعني في الصعيد دلوقتي مش بيستخدموا قوي، ولكن هو مفهوم بالنسبه لهم، هتلاقي في الصعيد ما فيش حد مش فاهم معنى الكلام ده، وأنا بحاول على قد ما اقدر أنه يبقى الكلام غريب ولكن لو دورتي عليها تفهمي معناه".
معاني كلمات ترنيمة بالك مندار من مسلسل المداح
وشرح المؤلف أسامة محرز، الكلمات الصعبة في ترنيمة بالك مندار أول ترانيم الجزء الخامس من مسلسل المداح، قائلًا: "بالك مندار : يعني مقلوب أو بالعكس فالمقصود بيجملة بالك مشتت يعني مقلوب يعني بالك مش مضبوط، تايه".
"فكرك مابدور، بتكمل نفس المعنى اللي بيشير للحيرة وانشغال البال وقلة التركيز"
“لا حميت الدار ولا شفت النور: حماية الدار هنا مقصود بها الرسالة بتاعته ومش مقصود بيها داره هو بس، دار البني ادمين، يعني الرسالة بتاعته هو ما قدرش يحميها يعني لحميه الدار ولا شوفت النور يعني أنت ما وصلش لاي حاجه في اللي أنت بتسعى توصله”.
"حواليك لابدين: لابد يعني مستخبي في الصعيد يعني حتى يقول لك لابد في الذرة يعني اللي هو بتبقى عيدان طويلة يعني مستخبي في الذرة أو يعني بيستنى يعني في حواليك مستخبين، الشقه الشق بالقاف يعني أنه هما في شقوق في شقوق الصعيدي لابدين يعني مستخبين حواليك"
" فرزينك زين: يعني عارفينك وعارفين مكانك لو مهما تعلي الصور لو مهما بتحاول تتحصن ومهما تتقوى بإيمانك، إحنا عارفين نوصل لك برضو".
