"ابني بيموت".. مواطن يستغيث بسرعة التدخل لعلاج رضيعه بالمجمع الطبي بالإسماعيلية (خاص)
تلق موقع الأيام المصرية استغاثة مفجعة من المواطن محمد حسن عيسى عيسى الفهلاوي، يطالب فيها المسؤولين بالتدخل الفوري لإنقاذ حياة طفله الرضيع المحتجز بالعناية المركزة بالمجمع الطبي بالإسماعيلية، بعدما هددته إدارة المستشفى بخروج الطفل لعدم قدرته على دفع تكاليف العملية والحضانة التي بلغت 100 ألف جنيه.
ينقل لكم موقع "الأيام المصرية" تفاصيل الاستغاثة كما جاءت على لسان الأب المكلوم دون أي تعديل:
"اسمي محمد حسن عيسى عيسى الفهلاوي، الأصل من شمال سينا، مقيم ومتزوج وقاعد في أبو صوير. مستأجر وقاعد في أبو صوير المحطة بالإسماعيلية. زوجتي كانت حامل على وش ولادة، اتصلنا بمستشفى الطوارئ بالإسعاف حولونا على مستشفى الصالحية عشان مستشفى القصاصين ما فيهاش إلا تأمين صحي شامل، وكانوا طالبين مننا مبلغ قيمته 20,000 جنيه حق الولادة الطبيعية. طبعاً بناءً على قرار السيد رئيس الجمهورية الولادة الطبيعية مجاناً، بس هما مش معترفين بالقرار دوت عشان تأمين شامل.
خدت مراتي وطلعنا على الصالحية ولدت هناك، بعديها بأسبوع، تمام؟ بعد ما خدنا العيل، العيل تعب، احتاج حضانة، كان عنده التهابات على الصدر وكان عنده وكان عنده الصفرا عالية، واديناه في جمعية شرعية اللي هي في القنطرة، تمام؟ بعد كده بين من الحالة بعد ما قعد أسبوع في الجمعية الشرعية، بعد كده اتضح أن عنده انسداد في الأمعاء الغليظة، انسداد في الأمعاء الغليظة، والعملية خطيرة.
ادوني الولد وخدته وطلعت بيه على المجمع الطبي في إسماعيلية. سلمت لهم هناك الولد، تمام؟ واديته واديته التقارير والتحاليل والأشعة وكل حاجة اللي تثبت، وكمان حتى كان في نسبة عدوى بس مش عدوى عالية أوي. تمام؟ وقال لي: تمام، خدوا الحالة مني وقالوا لي: حاول تخلص إجراءات التأمين الشامل عشان هتدفع مبلغ كبير. طبعاً هما عملوا العملية للطفل، بقالهم كده 24 ساعة، الطفل حالياً في العناية المركزة.
دلوقتي هما بيقولوا لي: لو أنت ما دفعتش الـ 100,000 جنيه أو ما عملتش كارنيه التأمين الصحي الشامل، هنطلع لك العيل وتاخده توديه في أي مكان أنت حر، إحنا غير مسؤولين عنه. طب دلوقتي أنا بناشد أنا بناشد الرئيس عبد الفتاح السيسي، وبناشد رئيس مجلس الوزراء بإعفائي من كافة مصروفات الحضانة، بإعفائي من كافة مصروفات الحضانة ومصروفات ومصروفات العملية. برجاءً سماع صوتي، أنا أب وتعبان، أب بالله عليكم، بالله عليكم، بالله عليكم حلولي مشكلتي. بالله عليكم، بالله عليكم حلولي مشكلتي.
أنا صرخت وبعت شكاوي لمجلس الوزراء، مجلس الوزراء ما بيردش عليا، بيقولوا لي: حاضر، وبـ وبينيموني، ما حدش بـ بيعملي حاجة، ما حدش بيحلي حاجة، أنا صرخت وبصرخ وما زلت بصرخ. أنا تعبان، رجاءً الحقوا ابني، ابني بيموت، ابني في العناية، عاوزين يدهولي على وضع كده لو أنا ما كملتش الإجراءات. طب أنا دلوقتي كأب ماليش تأمين شامل، أنا راجل أرزقي على باب الله، وبطاقتي العريش، ورفضوا، وماليش حد يساعدني، ماليش لا أب ولا أم ولا أي حد يساعدني.
وزوجتي كمان ربة منزل، وزوجتي كمان ربة منزل، يعني أنا ماليش أي دخل أو ليا أي حاجة أعملها في حياتي، ماليش والله العظيم ماليش، والله ماليش، أنا ظروفي على قدها، والله ماليش، يا جماعة والله العظيم ربنا اللي عالم بيا، أنا والله كل اللي محتاجه من ربنا سبحانه وتعالى اعفوني عن مصاريف مصاريف الحضانة والعملية، ابني، ابني ماليش غيره والله العظيم هو حتة عيل واحد، والله ماليش غيره، والله ماليش غيره، بالله عليكم وعشان خاطر ربنا ساعدوني".
اقرأ ايضًا:
والد الطفلة كارما لـ الأيام المصرية بعد استغاثتها من اعتداء زوج والدتها: وعايز حق بنتي
خناقة مستشفى الكابلات اليوم.. التفاصيل الكاملة لواقعة تعدي بين طبيبة وأسرة مريضة
تابع موقع الأيام المصرية عبر تطبيق (فيسبوك) اضغط هــــــــــنا
تابع موقع الأيام المصرية عبر تطبيق ( الأيام نيوز) اضغط هــــــــــنا
تابع موقع الأيام المصرية عبر تطبيق (تويتر) اضغط هــــــــنا
موقع الأيام المصرية، يهتم موقعنا بتقديم خدمة صحفية متميزة للقارئ، ونقدم لكم خدمة ومتابعة شاملة ومجموعة كبيرة من الأخبار داخل الأقسام التالية، أخبار، رياضة، فن، خارجي، اقتصاد، الأيام TV، حوادث، خدمات مثل سعر الدولار، سعر الذهب، أخبار مصر، سعر اليورو، سعر العملات ، جميع الدوريات.
