ابنة محمد مرزبان بعد مرور أسبوع على وفاته: لسة مش قادرة أصدق

الخميس، 25 يونيو 2026 10:13 ص

رثت ابنه الفنان محمد مرزبان والدها الراحل بكلمات مؤثرة، وذلك عبر حسابها الشخصي على موقع فيسبوك، وعبرت عن حزنها وصدمتها أنها حتي الآن لا تستوعب رحيله وطلبت الدعاء له بالرحمة والمغفرة.

منشور ابنة محمد مرزبان

كتبت ابنته:" يا بابا عدى أسبوع من ساعة ما مشيت، ولسه مش قادرة أصدق إن دي الحقيقة. لسه مستنياك تدخل من الباب أو أسمع صوتك بتناديني. مش قادرة أستوعب إني مش هشوفك تاني ولا هسمع صوتك إلا في الصور وvoice notes اللي بقيت بسمعها كل يوم و اسمع نصايحك ليا و "صباح الفل يا شهوده" عشان أصبّر نفسي.

وأضافت:" كل يوم بصحى من النوم بتمنى إنه يكون كابوس وإن مفيش حاجة حصلت و اشوفك تاني. كان نفسي تقوم بالسلامة و تشوف حب الناس من اللي تعرفك واللي متعرفكش، وكان نفسي تسمع الكلام الحلو اللي بيتقال عليك من كل الناس ، والناس اللي وقفت جنبنا ومعانا وبتعمل ده من حبها فيك، وقد إيه سيرتك طيبة و حلوه احنا عشنا ولسه وهنفضل عايشين متشرفين إنك أبونا.

كان نفسي في حاجات كتير أوي لسه نعملها مع بعض

وتابعت:" كان نفسي في حاجات كتير أوي لسه نعملها مع بعض؛ خروجات، وسفريات، وقعدة البيت ناكل على سفرة واحدة، وحسن وحمزة يصدعوك من كتر الكلام، وفرح Jessy وAhmed، وفطار يوم الجمعة بعد الصلاة، قعدتنا نتفرج علي فيلم و نتجمع نتفرج علي ماتش و حاجات كتير أوي اوي اوي.

واختتمت:" مشيت وسيبت فراغ كبير أوي قلبي واجعني يا بابا. بس أنا حلمت بيك واطمنت إنك بخير وفي مكان أحلى بكتير، وربنا بعتلنا علامات كتير تطمّنا عليك يا حبيبي، كان نفسي أقولك كل يوم إني بحبك. كان نفسي أحضنك وأبوسك كل يوم. كان نفسي أقولك كل يوم إنك أعظم أب في الدنيا.

بس انا هفضل كل يوم ادعيلك و احاول اكون نسخه تانيه منك و اعمل الحاجات الحلوه و الخير اللي كنت بتعملها، و اربي عيالي انهم يبقي شبهك و زيك، بحبك اوي يا حبيبي يا روح قلبي. و ان شاء الله نتقابل في الجنه. الله يرحمك يا حبيبي".

اقرأ أيضاً

تابع موقع الأيام المصرية عبر تطبيق (تويتر) اضغط هــــــــنا

موقع الأيام المصرية، يهتم موقعنا بتقديم خدمة صحفية متميزة للقارئ، ونقدم لكم خدمة ومتابعة شاملة ومجموعة كبيرة من الأخبار داخل الأقسام التالية، أخبار، رياضة، فن، خارجي، اقتصاد، الأيامTV، حوادث، خدمات مثل: سعر الدولار، سعر الذهب، أخبار مصر، سعر اليورو، سعر العملات ، جميع الدوريات