ملوا من الجيم.. 40 بنت وأم يكسرن الروتين بـ "تمرينات صباحية" على نيل المنصورة
في لافتة مبهجة تعكس رغبة المرأة في استغلال المساحات العامة لممارسة الرياضة، شهد ممشى النيل بمدينة المنصورة بمحافظة الدقهلية انطلاق مبادرة Girls on Track.
المبادرة بدأت بفكرة فردية لطالبة قررت الخروج من الصالات الرياضية المغلقة، لتتحول بمرور الوقت إلى تجمع يضم عشرات الفتيات والأمهات اللاتي يمارسن التمرينات الصباحية والجري في الهواء الطلق.
كنت بجري لوحدي ودلوقتي 40 بنت
أسماء صاحبه الفكرة تروي: في البداية كنت بنزل أجري لوحدي، بعدين لقيت البنات نزلت معايا.. مرة جات اتنين، مرة تلاتة، مرة أربعة، مرة خمسة، مرة 20، مرة 30.. وحاليًا دلوقتي 40 بنت، ولقيت بنات كتيرة نفسها تنزل وتجرب الحاجة دي.
وأضافت أسماء: أنا نزلت أجري في الشارع عشان مليت من الجيم والنادي، فبعد كده صليت الفجر وقررت إن أنا أنزل أجري في الشارع.
ومن هنا بقى ابتديت أقول مع نفسي يعني.. ليه البنات مش بتنزل تجري في الشارع الصبح في الوقت ده؟ في الهواء النظيف مع صوت العصافير.. الأجواء كانت جميلة فعلًا، هنا في المنصورة الموضوع مكانش طبيعي خالص.
ولم تخل التجربة في بدايتها من بعض التحديات المجتمعية، نظرًا لعدم اعتاد البعض رؤية الفتيات يركضن في الشوارع، وهو ما علّقت عليه أسماء فهمي قائلة:
"في الأول أنا فعلًا اتعرضت لمواقف سخيفة، بس بعد كده لما بقينا دلوقتي عصبة بنات مع بعض الموضوع بقى يعني إيزي، سهل، عادي.. الناس تقبلته".
أمهات وعربات أطفال.. المبادرة تجذب مختلف الأعمار
مع استمرار المبادرة وتداول صورها، نجح الفريق في جذب أنظار فئات مختلفة، ولم يعد الأمر مقتصرًا على الشابات بل امتد ليشمل الأمهات اللاتي رغبن في كسر الروتين ومشاركة أطفالهن الأجواء الصباحية.
تقول سميرة سعد (إحدى المشاركات): "كنت مترددة جدًا إن أنا أنزل وأجري في الشارع كده قدام الناس عادي، بعد كده شفت الجروب فيه ماميز نازلين وبيجروا والدنيا جميلة يعني، فقلت خلاص لا أنا لازم أكلمهم.
بينما تشاركها يارا (إحدى الأمهات المشاركات) تجربتها مع طفلها قائلة: قررت إنه ليه لأ أنزل أتمشى، ابني يشوف الدنيا، يشوف الشمس، يشوف الشجر، يشوف الناس.. وده بالفعل حسنه وحسن نومه وحسن جهازه العصبي جدًا، فجاءت من هنا الفكرة إن أنا أكلم كابتن أسماء وأقولها أنا عايزة أنزل بالبيبي بتاعي وهي رحبت جداً بالفكرة".
تجربة تجمع بين الرياضة والبهجة
اختتمت نوران إسماعيل (طالبة مشاركة): تجربة جميلة جداً وفيها ناس من مختلف الأعمار، وناس كل اللي بيجمعهم إنهم بيحبوا يجربوا حاجة ويجربوا إن هم يجروا الصبح، فحبيت التجربة جدًا.
