رحمة أحمد: المنتج طلب أرقص له.. واقعة تحرش داخل الوسط الفني تشعل مواقع التواصل
أثارت تصريحات الفنانة رحمة أحمد حول واقعة مرتبطة بتعاملات مهنية داخل الوسط الفني تفاعلًا واسعًا على مواقع التواصل الاجتماعي، بعد حديثها عن تعرضها لموقف وصفته بأنه مرتبط بسوء استغلال للظروف خلال مراحل العمل، وهو ما أعاد فتح النقاش حول بيئة العمل في المجال الفني وآليات تنظيم العلاقة بين الفنانين وصناع الإنتاج.
تفاعل كبير وانقسام في ردود الفعل
شهدت منصات التواصل الاجتماعي حالة من الجدل والانقسام، حيث عبّر عدد كبير من المستخدمين عن تضامنهم مع الفنانة رحمة أحمد، معتبرين أن ما طُرح يسلط الضوء على ضرورة تعزيز حماية الفنانين داخل مواقع التصوير وأثناء التعاقدات المهنية.
في المقابل، دعا آخرون إلى ضرورة التعامل مع مثل هذه التصريحات بحذر، وعدم استباق نتائج التحقيقات الرسمية، مؤكدين أن الفصل في هذه القضايا يجب أن يتم عبر الجهات القانونية المختصة، وليس من خلال منصات التواصل الاجتماعي.
دعوات لتشديد الرقابة داخل الوسط الفني
أعادت الواقعة المطروحة فتح ملف آليات العمل داخل الوسط الفني، حيث طالب عدد من رواد السوشيال ميديا بضرورة وضع ضوابط أكثر وضوحًا لتنظيم العقود الفنية، بما يضمن الشفافية الكاملة في الاتفاقات بين الأطراف المختلفة، ويحد من أي ممارسات قد تُفهم على أنها ضغط أو استغلال.
كما دعا آخرون إلى تعزيز دور النقابات الفنية في متابعة بيئة العمل، وتوفير قنوات رسمية وآمنة لتلقي الشكاوى، مع ضمان السرية الكاملة وحماية المشتكين من أي تبعات مهنية أو اجتماعية.
أهمية التوثيق القانوني للعقود الفنية
وأشار متابعون إلى أن أحد أبرز التحديات التي تواجه العاملين في المجال الفني يتمثل في غياب الوضوح الكامل في بعض العقود أو ضعف التوثيق القانوني، ما قد يؤدي إلى خلافات أو سوء فهم بين الأطراف.
وطالبوا بضرورة نشر الوعي القانوني بين الفنانين الشباب، وتشجيعهم على مراجعة العقود مع مختصين قبل التوقيع، لضمان حقوقهم وتجنب أي إشكالات مستقبلية.
مطالب بالتحقيق واحترام الإجراءات القانونية
في ظل استمرار التفاعل، شدد عدد من المستخدمين على أهمية التعامل مع مثل هذه القضايا عبر القنوات الرسمية فقط، مع ضرورة فتح تحقيقات في حال وجود شكاوى موثقة، بعيدًا عن تحويل مواقع التواصل إلى ساحات أحكام مسبقة.
وتبقى تصريحات الفنانة رحمة أحمد محل نقاش واسع، وسط دعوات متزايدة لإصلاح بيئة العمل الفني وتعزيز الحماية القانونية للعاملين داخلها، في ظل جدل مستمر حول طبيعة العلاقات المهنية داخل الصناعة الفنية.
رحمة أحمد تروي تفاصيل صادمة داخل الوسط الفني وإليكم النص الكامل:
“مش قادرة اصدق ازاي مستغربين الست اللي راجل ف مدرسة كان بيستدرجها علشان يخلصلها حاجة وكله شايف انها غلطانة علشان بتحاول تثبت حقها واستدرجته ف الكلام علشان تثبت اللي بتتعرضله انتوا عارفين كام حق واحدة راح بسبب الكلام ده”
بداية القصة وعرض العمل
“من سنتين إلا كام شهر بالظبط كنت شغاله ف حاجة وكان منتج العمل راجل كبير ف السن المهم أنا مكنتش اعرفه معرفه شخصية المهم لما جالي العمل ده كنت مفكرة انه دور صغير لانه مكنش مكتوب فيه غير كام حلقة المهم وفقت ع فلوس عبيطة اوي”
“وطبعا الدور كان محتاج لبس معين مش موجود ف دولابي الشخصي يعني لازم اجيب لبس للشخصية وطبعا اجري كله مكنش يجيب تمن ٣ اوتفتات ع بعض فطلبت من الانتاج اللي اتفق معايا انهم يزودولي فلوس خصوصا اني عرفت ان دوري اكبر وهكون موجودة لحد آخر العمل، قالولي صعب احنا اتفقنا ع كده قولتلهم طب هاتوا انتوا اللبس و خدوه بعد كده قالولي صعب.”
اقتراح التواصل مع المنتج الفني
“المهم المساعدة اللي معايا اقترحت عليا اكلم المنتج الفني ع طول و هو راجل صاحب سمعه كويسه و مش هيرضى بالكلام ده قولتلها ماشي. خدت رقمه و قولتله يا استاذ فلان أنا الممثلة فلانه الفلانيه ومعاكوا ف العمل وحكيتلوا اللي حصل وكان متفهم جدا معايا وراجل ذوق وجميل وقالي طيب تعالي المكتب بس”
“متقوليش لحد لاني مش بوافق ازود فلوس ولو حد عرف اني زودتلك فلوس هيعملوا معايا مشاكل، قولتله طيب ممكن تحولي الفلوس ع حساب البنك بتاعي قالي لا لان هنحتاج نغير العقد كله و لازم تمضي قولتله تمام.”
عقد جديد وعرض غير متوقع
“وفرحت جدا من ذوقه وطيبته و قد ايه هو أب جميل و فعلا روحت المكتب اول مرة و كان مجهز العقد فعلا و زودلي الضعف اللي هو بالمناسبه كان رقم قليل بردو، أنا فاكرة كان ف بنوته معايا ف نفس المسلسل كانت واخده مشهدين و مش دور مهم زي اللي كنت عاملاه وواخده اكتر من فلوسي بعد مازادت كمان، قولت يابت مش مشكله اثبتي موهبتك الاول و بعد كده تبقي تتكلمي فلوس بعد كده براحتك.”
“المهم هو كان محضرلي عقد تاني غير عقد المسلسل، عقد اسمه عقد رعايه حاجة شبه الاحتكار كده وقالي انتي شاطرة وموهوبة ومشروع نجمه وشكلك حلو وبلا بلا بلا، العقد ده هيكون ١٠ سنين بينا هتشتغل ف كل أعمال الشركة وهنهتم بيكي إعلاميا وتطلعي ف برامج ونعملك ونسويلك وسوشيال ميديا”
“وكلام يخلي اي ممثل يقبل ع طول وهتاخدي مرتب شهري من الشركة واي عمل هيجيلك هناخد احنا نسبه كبيرة منه ولازم كمان يكون بموفقتنا واي عمل الشركة هتنتجه انتي ليكي اولوية انك تشتغلي.”
ظروف شخصية ومحاولات كسب الثقة
"المهم قولتله هفكر و ارد عليك علشان مبفهمش ف حوار العقود ده و هكلم المحامي بتاعي بردو ، قالي أنا مش كسبان حاجة خصوصا انك مش مستقرة ف القاهرة و عايزة بيت وهتدفعي إيجاره منين وتستقري للفن وبس بدل مانتي مش مركزة كده بسبب ظروفك"
"وطبعا أنا لما كان بيسألني ع اي حاجة كنت برد بصراحة عادي لان اللي عارفني عارف اني كنت شخص تلقائي مبيفكرش ف الكلام اللي بيقوله كتير و حكيتله لما سألني عن ظروفي و كده خصوصا انه راجل كبير و شكله فعلا ف الاول كان اب و جميل معايا جدا و متوقعتش منه اي غدر بصراحة ولا حتى كان ف تلميحات باي حاجة تاني مش تمام."
"وفعلا قالي فكري ولو احتاجتي حاجة أنا هنا وجنبك واداني وقتها جزء من الفلوس اللي هو رقم عبيط بردو علشان كنت مستعجله و عايزه الحق اشتري لبس علشان عندي مشاهد هصورها كمان كام يوم و مكنش معايا فلوس حتى اشتري لبس الشخصية او بمعنى اصح كان معايا اللي يخليني بدفع ايجار و اكل و اشرب و بس."
البحث عن سكن جديد
وكمان الوقت ده كنت لسه بدور ع ستوديو ف القاهرة سعره يكون افضل و ف مكان امن و هو قعد يفكر معايا و قالي بلاش استوديو انتي محتاجة شقة كبيرة لان اكيد عندك لبس كتير هتحطيه فين ف نفس المكان اللي هتنامي فيه مش هتكوني مرتاحة دوري ع حاجة اكبر، و ده كان احساس جميل ان حد يفكر معايا ف حاجة كانت عاملاتي مشكله الفترة دي"
"وبعد مامشيت فضل يتصل بيا يوميا ها عملتي ايه ولقيتي حاجة مناسبه ولا لسه و ياكد عليا خدي شقه حتى لو سعرها هيكون غالي شوية ان شاء الله لما نشتغل اكتر هتعرفي تدفعي الايجار و كمان تشتري شقة بدل التعب اللي انتي فيه ده."
موعد جديد للحصول على المستحقات
"وانا اشكره ومبسوطة اوي ان الحمد لله قابلت شخصية جميله وف الوسط وهيساعدني كمان ف اكتر حاجة بحبها وهي التمثيل، وفعلا لاقيت شقة كويسه وسعرها غالي شوية بس امان وبدات أفرشها واحده واحده لحد بردو ماجيت اصور باقي شغلي واحتجت دفعه من الفلوس تاني علشان لازم اروح التصوير ومش معايا لبس الشغل 😊."
وتابعت: "قالي تعالي قعدت أتحايل كتير عليه يحولي الفلوس لان تصويري بكرة وعايزه ادفع الفلوس وأنا شخص مبيحبش يستلف و فعلا استلفت فلوس و قولت للشخص اللي سلفني هديهالك ع طول، المنتج قالي مبعرفش اتعامل مع التحويلات و كده ومش معايا كاش فضلت احاول معاه طيب محفظة طيب شوف حد جنبك اديله الفلوس وحولهم، مفيش خالص، قالي تعالي ٥ دقايق خدي الفلوس وامشي ع طول قولتله الجو متاخر اوي قالي بسرعه خديهم و امشي قولت تمام."
اللحظات التي أثارت الشكوك
"مع إني كنت تعبانه جدا بين إني بفرش بيت جديد لوحدي وبطولي وبين اني انزل اشتري لبس الشخصية و بين اني لازم أذاكر شغلي اللي هصوره و بين اني لازم انام كويس علشان اكون مركزه ف التصوير و خدت بعضي و روحت."
"دخلت المكتب كان عنده عامل واحد شغال فيه وكان بيمسح وبينضف المكتب فقالي تعالي هنعد ف المكتب التاني لحد ماهو يخلص واديكي الفلوس قولت ماشي، المهم دخلني المكان التاني وقالي اقعدي ثواني استنيني و هرجعلك قولت تمام."
"قعدت فعلا ومش مدية اي خوانة ورجع قالي معلش الفلوس جايه ف الطريق علشان مش عارف ايه ٥ دقايق بس يكونوا وصلوا ولاقيته جايبلي العقد تاني بتاع الاحتكار ده وعايزني امضي، قولتله بصراحة العقد مش مطمني وأنا مبحبش النوعية دي من العقود فخلينا نشتغل مع بعض عمل بعمل وخدوا النسبه اللي عايزين تاخدوها كشركة قعد يتكلم شويه وحاول يقنعني، قلبي مكنش مرتاح للعقد خصوصا كل اللي سألتهم قالولي أوعي تعملي كده.
رواية الواقعة
المهم بدأ يطلب طلبات غريبة قالي تعرفي تعيطي فجاه تعرفي تعملي واحده مدمنه وواحده مش عارف ايه كلها ليها علاقة بالتمثيل وملهاش علاقة بالموضوع ولا بالعقد و لا بالفلوس اللي جايه اخدها ولا بحالتي النفسيه ف الوقت ده.
و فجاه راح قايم و قعد يشدني ليه جامد بعنف و قالي ارقصي و بيحط ايده ع ضهري( ف مكان حساس ).
رد فعلها بعد الواقعة
"أنا اتجمدت مكاني وأدركت اللي أنا فيه وان الباب اتقفل علينا ومفيش كاميرات حواليا زي المكتب التاني والراجل اللي كان شغال ف المكان بعد ماعملنا القهوة قاله أنا همشي وفعلا مشي وقفل وراه الباب بالمفتاح ولو صرخت ولا قولت حاجة هيتقالي إنتي اللي هنا موجودة بنفسك بكامل إرادتك ومكنش بيكلمني رسايل كانت كلها مكالمات وFaceTime كلها.
"كل ده ف اقل من الثواني جه ف مخي حرفيا مخي اتشل كل اللي كنت بفكر فيه ازاي اخرج من غير ماحاجة تحصلي ومن غير ماياخد مني حاجة غصب عني كله كوم وصدمة إني كنت شايفاه زي أبويا كوم خصوصا إن الموضوع ده عندي حساس شوية."
"المهم انهارت ف العياط وبدات اقول كلام حقيقي مش فإكراه من كتر الصدمة وهو فضل يهديني وكان خايف من صوتي العالي وقعد يقولي أنا ايه حاسس إني قدام طفلة عندها ١٢ سنه ماهو ده عادي ومش عادي."
"المهم فضلت استسمحه اني امشي و مش هتكلم ف اي حاجة المهم امشي و الحمد لله انه طلع جبان و خاف و سابني امشي فعلا و محصلش تحرش اكتر من اللي حصل انه يحط ايده ع آخر ضهري ف مكان حساس."
لماذا لم تتقدم ببلاغ؟
"أنا طبعا لا كان ينفع ابلغ ولا اشتكي ولا اقول اي كلمة لان مش معايا دليل واحد حتى دلوقتي سهل جدا اي كلب يطلع ويقول اني بقول اي كلام لان ممعيش دليل و ساعتها هو هيبقى صح وانا اللي غلط."
رسالة أخيرة
فبعد اذنكوا متلوموش الست انها صورت وفضلت تجاريه ف الكلام لان دي ام شجاعه عملت كده علشان تجيب حق بنتها وتدافع عن كرامتها ونفسها ولو أنا كان معايا دليل واحد بس اقسم بالله ما كنت سكت حتى لو كنت هموت فيها بس سيباه لربنا اللي أكبر من اي قانون وأكبر من اي ادلة حسبي الله ونعم الوكيل فيه دي لوحدها كفاية وبالدنيا ومافيها."
اقرأ أيضاً
مواعيد مسرحية "زائد واحد" على مسرح الهناجر
الناقدة ماجدة خيرالله تشيد بمسلسل ورد على فل وياسمين
تابع موقع الأيام المصرية عبر تطبيق (فيسبوك) اضغط هــــــــــنا
تابع موقع الأيام المصرية عبر تطبيق ( الأيام نيوز) اضغط هــــــــــنا
تابع موقع الأيام المصرية عبر تطبيق (تويتر) اضغط هــــــــنا
موقع الأيام المصرية، يهتم موقعنا بتقديم خدمة صحفية متميزة للقارئ، ونقدم لكم خدمة ومتابعة شاملة ومجموعة كبيرة من الأخبار داخل الأقسام التالية، أخبار، رياضة، فن، خارجي، اقتصاد، الأيام TV، حوادث، خدمات مثل سعر الدولار، سعر الذهب، أخبار مصر، سعر اليورو، سعر العملات ، جميع الدوريات.
