عيد ميلاد عادل إمام.. إلهام شاهين: الزعيم وش الخير عليّا (خاص)

الأحد، 17 مايو 2026 05:24 م

حرصت الفنانة إلهام شاهين على تهنئة الزعيم عادل إمام بمناسبة عيد ميلاده الـ86، مؤكدة أن له فضلًا كبيرًا في مشوارها الفني، وأنه كان “وش الخير” عليها منذ بداياتها الأولى في عالم السينما.

وقالت إلهام شاهين، في تصريح خاص لموقع “الأيام المصرية”: “كل سنة والنجم الكبير عادل إمام طيب وبخير، وربنا يديله الصحة ويخليه لينا يارب، طبعًا عادل إمام وش الخير عليّ وله فضل عليّ، أول مرة في حياتي أقف قدام كاميرا كانت في فيلم أمهات في المنفى سنة 81، فيلم قصة الدكتور يوسف جوهر، وإخراج محمد راضي، والبطل عادل إمام، فكان ليا الشرف إني أول مرة أشتغل في حياتي أقف قدام نجم النجوم عادل إمام”.

إلهام شاهين تتحدث عن فيلم الهلفوت

وأضافت: “بعدها بحوالي أربع سنين، كانت أول بطولة ليا في حياتي سنة 85 في فيلم الهلفوت، ودي كانت أول بطولة ليا مع الزعيم، وتأليف وحيد حامد وإخراج سمير سيف، أساتذة كبار جدًا جدًا”.

وتابعت: “الفيلم ده كان فيه صناعة نجمة، إني بقف مع كاتب ومخرج ونجم كبار أوي، ومدير تصوير عظيم زي وحيد فريد، وأكبر شركة إنتاج صوت الفن، اللي أصحابها محمد عبد الوهاب وعبد الحليم حافظ، فكانت حاجة مشرفة وكبيرة جدًا بالنسبة لي”.

وأكدت أن “الهلفوت” كان علامة فارقة في حياتها الفنية، قائلة: “مش بس كان أول بطولة في حياتي، ده كمان كان أول جائزة أخدها كأفضل ممثلة، وبعدها عملت معاه فيلم رمضان فوق البركان، وكان فيلم جماهيري جدًا جدًا واستمر في السينما سنة كاملة”.

إنسان طيب جدًا وبيساعد الناس

وأشادت إلهام شاهين بشخصية الزعيم الإنسانية ودعمه الدائم للنجوم الشباب، قائلة: “اشتغلت معاه في 3 أفلام، كلهم أفلام ناجحة جدًا، وعادل إمام إنسان طيب جدًا، بيساعد الوجوه الجديدة وبيقف جنبهم وبيساندهم جدًا، وممكن يغششهم حاجات، حقيقي كان واقف جنبي تمامًا، ودايمًا لا أنسى فضله عليّ أبدًا”.

وأضافت: “هو شخصية ذكية جدًا جدًا، الواحد لازم يتعلم منه في اختياراته، لأنه عرف إزاي يستمر في نجوميته أكتر من 60 سنة واسمه عالي في السما بدون منافس”.

العالم كله بيطمن عنه

واختتمت حديثها قائلة: “الزعيم ذكي جدًا إنه يوصل للجمهور، وأعماله تبقى الأكثر جماهيرية في كل الوطن العربي، وحتى الجاليات العربية في أي مكان في العالم، دايمًا يسألوا عنه ويطمنوا عليه، لأنه حصل على حب واحترام الناس في كل مكان، وهو فعلًا مشرفنا في مصر، وبقوله كل سنة وهو طيب وعيد ميلاد سعيد وربنا يخليه لينا، وإحنا دايمًا فخورين بنجم النجوم عادل إمام”.