السجن المؤبد لقاتل زوجته خنقًا في المنوفية

الإثنين، 11 مايو 2026 02:49 م

قضت محكمة جنايات شبين الكوم بالمنوفية، اليوم الإثنين، بالسجن المؤبد للمتهم بقتل زوجته بقرية كفر السنابسة التابعة لمركز منوف.

تفاصيل واقعة قتل زوج زوجته بالمنوفية

تعود أحداث القضية إلى نوفمبر 2025، عندما شهدت قرية كفر السنابسة واقعة مقتل سيدة داخل منزل الزوجية، حيث تبين أن المتهم أنهى حياة زوجته خنقًا بعد مشادة كلامية نشبت بينهما نتيجة خلافات متكررة.

اكتشف نجل المجني عليها الواقعة في صباح اليوم التالي بعدما حاول إيقاظ والدته للذهاب إلى العمل، لكنها لم تستجب، فاستدعى خالته التي حضرت لتجدها متوفاة.

أقوال المتهم أمام جهات التحقيق

واستمع رجال التحقيق لأقوال المتهم، إذ قال: هو اللي حصل إني متجوز "س"، وخلفت منها أولادي، ودايما إحنا ومن ساعة ما اتجوزتها وإحنا مش بيعدي علينا وقت كويس وفي مشاكل بتحصل بنا كتير، وأنا اتكلمت معاها كثير ومع أهلها بس برده المشاكل فضلت مستمرة لحد إمبارح بعد ما عرفت من برة إنها كانت عاملة مشكلة مع واحد في الشغل هي وأختها.

وأردف: أنا رحت لأهلها حوالي الساعة 6:30، وقت أذان العشاء وقعدت مع أبوها وأمها وحكتلهم اللي حصل ورد أبوها إنه قالي دماغي بتوجعني وأمها قالت ريحنا منكم، فشربت معاهم الشاي وحجرين معسل قص وبعدين مشيت رجعت على البيت لقيت مراتي صاحية، فعاتبتها وقالتلي لو عاوز تطلقني طلقني وكان بقالها حوالي 50 يوم مانعة نفسها عني، وأنا طلبت منها بس هي مرضيتش
وأوضح: بعدين رحت عملت كوباية شاي ورحت فاتح باب الشقة وقاعد وهي كانت قاعدة في الصالة، وبعدين قالت لبنتي تقوم تغسل المواعين وبعدين غسلت المواعين، بنتنا هي اللي دخلت نامت بعدها، وبعدين كلمتني في موضوع المشاكل تاني وقالتي هي دي عيشتي وده وضعي والكلام ده كان حوالي الساعة 7، وراحت سخنت الماية ودخلت تستحمى وبعد ما استحمت طلعت قعدت تسرح شعرها ومسكت التلفون فضلت تلعب فيه وفضلت على كدا لحد الساعة واحدة ونص بليل.

وأكمل: على الساعة 2 بليل قولتلها يلا ننام بس هي منعت نفسها عني وأنا قولتلها لسة جايبك من بيت أهلك وماضيين إقرار وأنا مضيت علشان تيجي وتعمل كدا، وبعدين قولتلها ينفع تخلي أختك تشتمني النهارده شتمتني بالأب.

وأردف: كلمة مني على كلمة منها قمنا مسكنة في بعض وهي مسكتني من الجلابية بتاعتي وأنا ضربتها على وشها وبعدين قمت مسكها بايدي الاثنين وحطيت لإيدي على رقبتها وزنقتها في الجدار وقمت حاطط ايدي على رقبتها حوالي 5 دقايق لحد ما خلصت ولما سبتها وقعت على الأرض، وأنا خرجت من البيت بعدها رحت على الغيط علشان المكنة بتاعتي كانت هناك، وأخدت المكنة وطلعت عند جوز أختي وبلغته باللي حصل وقالي روح سلم نفسك في المركز، وأنا رحت على المركز سلمت نفسي ودا كل اللي حصل.