«تحدي كبير ليا»، ريم مصطفى تتحدث عن دورها الشرير في"فن الحرب"

السبت، 28 فبراير 2026 09:51 م

كشفت النجمة ريم مصطفى عن تفاصيل جديدة ومثيرة حول شخصية "ياسمين النشرتي" التي تلعبها في مسلسل فن الحرب الذي يعرض حاليًا ضمن السباق الرمضاني 2026، حيث أوضحت أن الشخصية تحمل أبعادًا نفسية مركبة تجمع بين القوة والشر نتيجة ظروف قاسية وتجارب مريرة مرت بها وأكدت أن هذه التحديات هي التي شكلت ملامح الشخصية النفسية لتظهر ريم لجمهورها هذا العام بوجه مختلف تمامًا عما اعتادوا عليه في أدوارها السابقة التي غلب عليها الهدوء والرقة

وريم لم تخبي قلقها من التجربة دي، حيث صرحت ل منصة "Yango Play" إن شخصية "ياسمين النشرتي" كانت تحدي حقيقي ليها حيث قالت نصًا " الجزء من الشر ده كان تحدي كبير، لأني عمري ما عملت حاجة شبهها قبل كدة" ووضحت إنها شايلة هم رد فعل الناس وتفاعلهم مع الدور، وعلقت بخوف ممزوج بالضحك: "ياسمين أكيد جواها جانب كويس، بس مش أوي، أنا خايفة بجد الناس تكرهني بسبب الشخصية دي".

تفاصيل شخصية ريم مصطفى في مسلسل "فن الحرب" رمضان 2026

ريم مصطفى لخصت حكاية "ياسمين النشرتي" في مسلسل "فن الحرب" بأنها مش مجرد ست شريرة، لكنها إنسانة "منحوتة" من المعاناة، وصفتها بأنها ضحية فقر وقسوة بيت وتربية غلط، وكل دي ضغوط خلتها تختار طريق التسلط والنفوذ عشان تحمي نفسها من الدنيا، كما أكدت إن ياسمين ما اختارتش تكون كدة، لكن الظروف هي اللي رسمت لها الطريق الصعب ده، وده اللي بيخلي الشخصية فيها صراع نفسي حقيقي بين اللي كان مفروض تكون عليه واللي بقت عليه فعلاً.

كملت ريم مصطفى كلامها عن "ياسمين النشرتي" ووضحت إن كل تصرفاتها الشريرة دي وراها دافع واحد وهو "الخوف والرغبة في البقاء". ريم شايفة إن ياسمين بتدافع عن نفسها بطريقتها الخاصة، لإنها مقتنعة إنها لو مكنتش قوية ومتسلطة "هتتداس وتموت". وصفتها بأنها ست وحيدة وضعيفة في الحقيقة، وملهاش حد يسندها في الدنيا، فقررت تخلق لنفسها درع من القسوة والنفوذ عشان تحمي هشاشتها الداخلية وتضمن إن محدش يقدر يأذيها تاني.

ريم مصطفى في "فن الحرب" مش مجرد ست قوية، دي "العقل المدبر" اللي بيحرك الخيوط من ورا الستار. ياسمين النشرتي اللي التفكك الأسري والمعاناة نحتوا شخصيتها، بقت ست متسلطة وعايزة تتحكم في كل دبة نملة حواليها. الحكاية كلها بتلف حوالين عملية نصب ضخمة لشركة توظيف أموال، وياسمين هي اللي خططت لكل حاجة، لدرجة إنها قدرت تورط جوزها في الليلة كلها، وهربت هي بالفلوس اللي اتجمعت من الضحايا، وده اللي بيخلي الأحداث في حالة غليان طول الوقت.

فريق عمل مسلسل "فن الحرب" رمضان 2026

مسلسل "فن الحرب" بيجمع توليفة نجوم تقيلة على رأسهم يوسف الشريف، ريم مصطفى، وشيري عادل، ومعاهم قامات فنية زي كمال أبو رية ومحمد جمعة. القائمة بتضم كمان مواهب شابة ومميزة زي إسلام إبراهيم، دنيا سامي، محمد عبده، محمد ناصر، وكريم أدريانو، بالإضافة لمشاركة إنجي سلامة، أحمد سلامة، يحيى أحمد، ريم رأفت، مريت الحريري، عبير فاروق، ياسر علي ماهر، عزت زين، وأحمد رفعت. العمل من تأليف عمرو سمير عاطف وإخراج محمود عبد التواب توبه.