أسامة حسن: شيكابالا خذ من الزمالك فوق المليار جنيه وبيهاجم النادي (فيديو)

الخميس، 06 نوفمبر 2025 12:02 ص

أكد أسامة حسن، نجم الزمالك السابق، أن شيكابالا، أكثر واحد استفاد من الزمالك وخد فوق المليار جنيه، وبيهاجم الزمالك علشان الإدارة وفيريرا مشوه.

وقال أسامة حسن الذى حل ضيفا على الإعلامي عمر ربيع ياسين في برنامج "مان تو مان": « شيكابالا أكثر واحد استفاد من نادى الزمالك، مين أشهر لاعب في الزمالك هو شيكابالا مين أكتر لاعب خد فلوس من الزمالك هو شيكابالا، طيب مين أكثر حد دخل فلوس للزمالك مش شيكابالا، تخيل مين.. كهربا «100 مليون» وعمرو زكى «100 مليون» وإمام عاشور «150 مليون» ومصطفى محمد «80 مليون»، أما شيكابالا خد فوق المليار من نادى الزمالك».

وأضاف نجم الزمالك السابق: «لما يطلع شيكابالا يتكلم بالطريقة دى على نادى الزمالك علشان الناس دى مشيته، وهو طلع بتصريحين مينفعوش يخرجوا من الكابتن التاريخي للزمالك، الأول بتاع الشيشة في نهائي دوري أبطال أفريقيا، حصل ولا محصلش.. مينفعش تقول كده الكابتن التاريخي لازم يحافظ على أوضة اللبس سواء بطل أو لا، المفروض ده الكابتن التاريخى بس بعد التصريح ده خلاص مينفعش وعرفنا إيه الغرض منه».

وتابع: « التصريح الثاني لما قال فيريرا يمشى أنت المفروض الكابتن مينفعش تقول كده من غير ما تدينى حلول، اللى قاعد على القهوة هيقولك يمشى زيه زيك، أنت لم تدينى حل يبقى أنت عاوز تبوظ، بتقول كده علشان مشاك، المفروض يعطينى حلول أننا نتعاقد مع مدرب عارف أفريقيا وعارف طريقة الزمالك وجمهوره دا كلام الكابتن، لكن كلام سوق الجمعة اللى بتقوله ده مينفعش وإزاى الناس دي لعبت في الزمالك».