عبد الحكيم عبد الناصر يكشف سرا عن النكسة وخطاب التنحي لعبد الناصر
تحدث عبد الحكيم عبد الناصر نجل الرئيس الراحل جمال عبدالناصر خلال حوار تليفزيوني ، عن بعض المواقف التي تعرض لها والده طوال مشوار حياته ، وكواليس فترة حكمه ورأيه في قراراته .
عبد الحكيم عبد الناصر تحدث عن والده الزعيم جمال عبد الناصر
وقال: أن ما يتردد عن اعتماد الرئيس الراحل عبدالناصر علي الكاريزما فقط هو مغالطه وغير صحيح ، مؤكدا أن عبدالناصر كان رجل دولة من الطراز الأول :
وأضاف خلال حوار تليفزيوني معه : لما حصلت أزمة سنة 1961 بين العراق والكويت، لما عبد الكريم قاسم وقتها كان عايز يضم الكويت، وده كان نظام جمهوري وده نظام أميري وراثي، جمال عبد الناصر خد صف الكويت، وأعلن أننا لازم نبعت قوات عربية، لأن لو ماخدناش صف الكويت، يبقى بنفتح الباب للإنجليز اللي خرجوا إنهم يرجعوا.
التسجيلات الصوتية للرئيس عبد الناصر
سُئل عبد الحكيم عن التسجيلات، فأجاب: هذه التسجيلات مفرغة وموجودة في مكتبة الإسكندرية، لكن التسجيلات الصوتية نفسها فيه جزء كبير منها موجود لدينا.
لما ابتدينا الموضوع ده، ابتدته أختي الدكتورة هدى من أكتر من 18 سنة، وكانت عمليات توثيق لجمال عبد الناصر. فابتدينا نجمع وندور على التسجيلات.
هدى راحت وقتها لله يرحمه صفوت الشريف، وكان وزير الإعلام وقتها، وصفوت الشريف معروف إنه أساسًا رجل مخابرات.
فلما كلمته علي جمع تسجيلات عبد الناصر ، قال لها: “أرشيف الإذاعة والتلفزيون، وكل شيء تحت أمرك" ، وحتى جاب المسؤولين عن الأرشيف وقال لهم: "أي حاجة تطلبها الدكتورة هدى ما ترجعوش ليّا فيها، هي صلاحياتها في المبنى ده، اعتبروها أكتر مني أنا" وأنا ما انساش الموقف ده أبدًا ، وعلى هذا الأساس جبنا تيم قعد في مبنى التلفزيون لمدة سنتين، نقل كل شيء.
تسجيلات عبدالناصر مع القادة والزعماء
وقال : في حاجات كانت موجودة هناك، لأن فريق من الإذاعة كان بيروح يسجل ، وفيه حاجات كانت موجودة في البيت عندنا، لأن في فترة من الفترات، في الآخر، الوالد كان بيشتغل من البيت، فكانت المقابلات اللي بتتم أو بتتسجل بتتعرض عليه، فكان موجود منها نسخة في البيت ، وهو كان بيسجل كل مقابلاته مع كل الرؤساء، وده على فكرة تقليد رئاسي، يعني أي مقابلة لأي رئيس أو ملك بتبقى مسجلة، وبمعرفتهم طبعًا ، وفي حاجات كتير كمان أخدناها من الأصدقاء.
فمثلاً: كل ما له علاقة بمعمر القذافي، خدته من العقيد القذافي الله يرحمه، لما كنا بنجمع وثائق وتعليمات ، حتى اللي ساعدنا ساعتها كان الله يرحمه أبو بكر يونس ، فكل شيء متعلق بالمقابلات والحاجات دي كان موجود.
تسجيلات لم تُنشر بعد
سُئل: هل هناك تسجيلات لم تُنشر حتى الآن؟
قال: بص، أغلبها موجود ومكتوب، في حاجات لسه لم تُنشر، لكن مش تسجيلات لم تُنشر.
وأنا عايز أقولك حاجة: كلام جمال عبد الناصر في الغرف، هو نفس كلامه في العلن ، يعني مثلًا الكلام اللي قاله في مقابلته مع القذافي، أو مع الرئيس الموريتاني مختار ولد داداه، هو نفس الكلام اللي قاله في مؤتمر المبعوثين اللي اتذاع على الهواء في مايو سنة 1960.
نفس المواقف، نفس القصص، قصة "قتل آخر جندي مصري"، قصة "مين ساعد ومين ما ساعدش"، وقصة "ميزانيتنا كانت كام وبقت كام"، كلها نفس الكلام والموقف واحد.
يكشف سرا عن النكسة
الناس بتنسى إن لما حصلت الهزيمة في يونيو 1967، جمال عبد الناصر استقال، لكنه رجع بإرادة شعبية، مش بس في مصر، لكن على مستوى العالم العربي كله.
ولما رجع، حدد مهمته الرئيسية: إزالة آثار العدوان.
كواليس خطاب التنحي
عن كواليس خطاب التنحي يوم 9 يونيو، قال عبد الحكيم: في اليوم ده، من أول ما قامت الحرب، كان التعامل محدود جدًا، لأن والدي كان حزين جدًا، أكتر من حزين، وكان مش مصدق اللي حصل، وشعر بالمسؤولية ، هو اللي خرج قدام الشعب وأعلن تحمله للمسؤولية ، حتى لما هيكل صاغ الخطاب، كتب فيه:
"إني أتحمل نصيبي من المسؤولية."
لكن عبد الناصر شطبها، وقال له:
"لا، أنا أتحمل المسؤولية كاملة."
وقال في الخطاب:
"وأقول لكم بكل صدق، وبرغم أي عوامل قد أكون بنيت عليها موقفي في الأزمة، فإنني على استعداد لتحمل المسؤولية كلها.
لقد قررت أن أتنحى تمامًا ونهائيًا عن أي منصب رسمي أو أي دور سياسي، وأن أعود إلى صفوف الجماهير، أؤدي واجبي معها كأي مواطن آخر."
فهو رئيس الدولة، وهو اللي بيتحمل المسؤولية، حتى لو أدى تكليفًا عسكريًا لقيادة الجيش، ولو القيادة ما عرفتش، بيبقى هو المسؤول.
تابع موقع الأيام المصرية عبر قناة (يوتيوب) اضغط هــــــــــــنا
تابع موقع الأيام المصرية عبر تطبيق (فيسبوك) اضغط هــــــــــنا
تابع موقع الأيام المصرية عبر تطبيق (تويتر) اضغط هــــــــنا
موقع الأيام المصرية، يهتم موقعنا بتقديم خدمة صحفية متميزة للقارئ، ونقدم لكم خدمة ومتابعة شاملة ومجموعة كبيرة من الأخبار داخل الأقسام التالية، أخبار، رياضة، فن، خارجي، اقتصاد، الأيام TV، حوادث، خدمات مثل سعر الدولار، سعر الذهب، أخبار مصر، سعر اليورو، سعر العملات ، جميع الدوريات.