عجز تام في الذراع بسبب خطأ طبي داخل مستشفى حكومي.. ننشر نص التحقيقات|خاص
ينفرد موقع الأيام المصرية بنشر نص التحقيقات في واقعة اتهام طبيب شهير بمستشفى حكومي بمحافظة القاهرة بالإهمال الطبي في علاج مريض يُدعى “محمد. ج”، ما تسبب في عجز دائم بيده اليسرى، وفق ما ورد في محاضر النيابة العامة وأقوال المجني عليه خلال جلسة التحقيق.
س: ما هي تفصيلات شكواك؟
ج: اللي حصل إن أنا يوم 28 / 2 / 2025 حوالي الساعة 5 مساءً كنت بلعب كورة ووقعت على إيدي الشمال من عند الرسغ، وساعتها كنت حاسس إن دراعي مكسور، وإيدي كانت تتدلي مني، وكنت بحاول أرفعها بإيدي اليمين، كنت في عين شمس، وطلعت على مستشفى خاصة، وقابلت هناك دكتور اسمه أحمد، أخصائي عظام في المستشفى، وكشف على إيدي الشمال وقال إنها مكسورة ومحتاجة عملية شرائح ومسامير، وكتب لي علاج لتقليل الورم اللي كان في دراعي الشمال.
ويوم 2 / 3 / 2025 ، رحت مستشفى الهلال بتوجيه من نقابة المحامين (عمال مصر)، وهناك قابلت دكتور اسمه محمد المراكبي، وعرضت عليه الأشعة اللي كنت عاملها في مستشفى الخاصة ، وقلت له إن دكتور أحمد قال لي محتاج عملية، فرد علي وقال: “مش محتاج عملية دلوقتي، خليك على العلاج وتعالى بعد أسبوع”.
وفعلاً تابعت معاه 4 مرات، وكل مرة كان بيكتب لي علاج جديد، لحد يوم 20 / 4 / 2025 لما رحت له وفك الجبيرة، وساعتها لقيت إيدي شكلها مش طبيعي ومش بتحرك وصوابعي ما بتتحركش، ولما واجهته قال لي عندك التهابات بسيطة ومفيش داعي للقلق.
بعد كده طلعت على مدير المستشفى، وقال لي: “ما تقلقش، أنا هعالجك، وتعالى العيادة الخاصة”، وبالفعل رحت له يوم 5 / 5 / 2025، وقال لي محتاج تروح مستشفى ABC تعمل عملية في عظمة الرسغ بشق عظمي ورقعة من الحوض، وتركب شريحة ذاتية الغلق، وأكد إن عندي هشاشة في العظام بسبب الجبس اللي كان مركب غلط.
روحت بعدها مستشفى الحلمية يوم 29 / 4 / 2025، وهناك كشف علي الدكتور سامر استشاري العظام، وقال لي إن عندي عجز شبه دائم ومحتاج عملية ترقيع عظمية، دلوقتي إيدي فيها عجز تام ومش قادر أستخدمها ولا حتى ألمس بيها حاجة بسبب الألم.
س: وأين أصبت تحديدًا؟
ج: يوم 28 / 2 / 2025 الساعة 5 مساء، وأنا بلعب كورة في عين شمس، وقعت على إيدي الشمال، وحصل كسر في الرسغ.
س: وماذا فعلت بعد الإصابة مباشرة؟
ج: رحت مستشفى الخاصة في شارع 6 أكتوبر المتفرع من شارع العشرين بعين شمس، وهناك كشف عليّ الدكتور أحمد.
س: وما التشخيص الذي توصل إليه الطبيب؟
ج: قال لي إن عندي كسر في إيدي الشمال ومحتاج عملية تركيب شرائح ومسامير.
س: وما الإجراء الذي أوصى به؟
ج: أوصى إن أعمل العملية في أقرب وقت لتثبيت الكسر.
س: وما التصرف الذي صدر منك بعد ذلك؟
ج: رحت على نقابة المحامين، وهما وجهوني على مستشفى الهلال عشان متعاقدين معاها.
س: وما الذي حدث هناك؟
ج: رحت مستشفى الهلال يوم 2 / 3 / 2025، وقابلت الدكتور محمد ،م، استشاري العظام.
س: وما التشخيص الذي توصل إليه الطبيب؟
ج: قال لي إن حالتي مش محتاجة عملية، وإن العلاج بالأدوية والجبس كفاية، وطلب مني أتابع معاه كل أسبوع.
س: وهل تابعت معه بالفعل؟
ج: أيوه، رحت له 4 مرات، وكل مرة كان بيقولي نفس الكلام ويكتب لي علاج جديد، لحد ما الحالة ساءت تمامًا.
س: وما الذي حدث بعد ذلك؟
ج: بعد ما فُك الجبس، لقيت إيدي مش بتتحرك خالص، ولما واجهته حاول يهديني، وقال لي الموضوع بسيط، لكن لما رحت مستشفيات تانية اتقال لي إن الكسر ملتحم غلط ومحتاج عملية ترقيع عظمي جديدة.
س: هل تربطك أي علاقة بالطبيب "محمد، م "خارج نطاق العلاج؟
ج: لأ، معرفوش غير إنه بيشتغل في مستشفى الهلال وبييجي هناك مرة في الأسبوع.
س: هل يمكنك تحديد سبب تدهور حالتك الصحية؟
ج: السبب الرئيسي هو إن الدكتور "محمد ،م" ما عملش العملية المطلوبة لتثبيت الكسر في الوقت المناسب، وسابني على علاج وجبس فترة طويلة، وده اللي تسبب في العجز الدائم.
س: هل لديك أقوال أخرى؟
ج: لا، مفيش.
