مي عمر تهاجم فنان شهير بسبب التريند: بيحتفل كإنه فتح القدس

الثلاثاء 02/سبتمبر/2025 - 11:04 م

وجهت الفنانة مي عمر، هجومًا حادًا لأحد نجوم مسلسلات "الأوف سيزون"، عبر حسابها الرسمي على موقع تبادل الصور والفيديوهات الشهير "إنستجرام".

واستخدمت مي عمر، خاصية "الاستوري"، وكتبت قائلة :"زميل، وكنت بعتبره صديق، طلع في رمضان كتب بوست بيتريق فيه على الناس اللي بتفرح وتشارك إنها ترند رقم واحد".

وأضافت مي عمر، قائلة :"البوست كان كله بقى "الترند مش هدف الشغلانة"، وإحنا بنشتغل عشان الفن مش الأرقام، كلام تنظير وفزلكة على أعلى مستوى".

وتابعت مي عمر، قائلة :"أنا ساعتها قلت مش هرد، وكنت سايبة الأيام تكشف عشان كنت عارفة إن عنده مسلسل هيتذاع أوف سيزون، وأول ما يقرب من أي ترند حتى لو دخل رقم عشرة نص ساعة، هيبقى مش مصدق نفسه وهيقعد يشارك ويحتفل كأنه فتح القدس".

وأكملت مي عمر، قائلة :"وفعلاً مكدبش خبر! أول ما مسلسله دخل التريند، بقى بيشارك فرحان إنه "رقم واحد "، الله هو الترند كان وحش في رمضان وبقى جميل دلوقتي ؟".

وأردفت مي عمر، قائلة :"طبعًا أنا مش ضد إن أي حد يفرح بنجاحه، بالعكس مبروك والله، ومن حقك تفرح وتشارك لإن ده تعبك ومجهودك بس ياريت نبطل المنظر بتاع أنا مختلف، أنا فوق الترندات، وبعد كده أول ما نقرب منها نطير من الفرح وننشر 20 ستوري".

مي عمر، قائلة :"أنا عارفة إن أي حد يعرفني كويس هيستغرب من كلامي، لأني عمري ما رديت على حد، بس بجد ليه إحنا شطار جدًا في إننا نحرم على غيرنا حاجة، ولما تيجي في ملعبنا تبقى فجأة أحلى حاجة في الدنيا ؟".

واختتمت مي عمر، قائلة :"في الآخر الترند مش هدف غير لما يبقى معانا، للتوضيح، كلامي مش موجه لأي نجوم شاركوا في العمل بالعكس أنا بقدرهم وباحترمهم علشان ماحدش يفهمني غلط".

ومن جانب آخر، استطاعت مي عمر، تحقيق نجاحًا كبيرًا في رمضان الماضي 2025، خلال مسلسل "إش إش"، الذي عُرض في النصف الأول من رمضان، إذ يتكون العمل الدرامي من 15 حلقة.