أقوال المتهم في حادث الإقليمي: السرعة كانت 50 كيلو وفجأة لقيتني عكسي

تنظر المحكمة المختصة، غدًا الثلاثاء، أولى جلسات محاكمة سائق التريلا النقل المتسبب في الحادث المأساوي، الذي وقع أعلى الطريق الإقليمي، في نطاق مركز أشمون، بـ محافظة المنوفية، والذي أسفر عن مصرع 19 مواطنًا وإصابة 3 آخرين، خلال توجههم إلى عملهم.

أكد السائق المتهم في اعترافاته أمام النيابة العامة أثناء التحقيقات، عن تفاصيل الحادث، قائلًا: اللي حصل إن يوم 27-6-2025، الساعة 8 الصبح تقريبًا، كنت ماشي على الطريق الإقليمي بعد كارتة الخطاطبة بمركز أشمون، بالعربية التريلا اللي أنا سايقها، على سرعة حوالي 50 كم/س كده تقريبًا، وكنت جاي من كارتة الخطاطبة ومتجه ناحية بنها الحر.

وأضاف سائق التريلا: فجأة، وأنا سايق، لقيت عربية ميكروباص ماشي قدامي، فخدت أقصى الشمال علشان أعدي منها، وفجأة لقيت حجر في التلتوار اللي في النص بين الطريقين رايح جاي، الحجر اللي شبه البندورة كان خارج بره شوية عن الحد بتاعه، وكنت هخبط فيه لو فضلت ماشي مستقيم.

 السائق المتهم يعترف السرعة كانت 50 كيلو وفجأة لقيتني عكسي

وأكمل سائق التريلا: من ارتباكي، اختلت عجلة القيادة مني، واختل توازن العربية والمقطورة اللي أنا سايقهم، وعديت التلتوار اللي في النص غصب عني، واتفاجأت إني بقيت ماشي عكسي للحظات، واتفاجأت بعربية ميكروباص لونها أبيض جاية في وشي، ماعرفتش أفاديها، وخبطت فيها بوش التريلا.

وتابع سائق التريلا: نزلت من العربية وجريت، لأن المنظر كان صعب أوي، وأنا خفت، وحسيت إنه لو ما هربتش، الأهالي كانوا ممكن يموتوني، وبعدها بحوالي ساعة تقريبًا، روحت على مركز شرطة أشمون وسلّمت نفسي، وهناك عرفت إن أغلب اللي كانوا في الميكروباص اللي أنا خبطته ماتوا، وناس منهم لسه متصابين، مؤكدًا أنه لم يقصد أذيتهم، مشيرًا إلى الحادث وقع دون قصد.

وبسؤاله عن عدم حمله الرخصة، قال: رخصتي ضايعة مني وأنا كنت جاي من شغلي في إسكندرية ورايح الشرقية، وعديت كارتة الخطاطبة، ومرة واحدة لقيت الميكروباص على يميني.

وبسؤاله أمام جهات التحقيق هل هناك خلافات بينك وبين المتوفين والمصابين أو أحد من أهلهم؟، أجاب قائلًا: لا علاقة ولا خلافات.