سمية الخشاب: الناس شايفاني ست جبارة، وكل واحدة نفسها جوزها يشيلها زي ما محمد رمضان شالني

كشفت الفنانة سمية الخشاب عن كواليس تعاونها مع النجم محمد رمضان في مسلسل "موسى" الذي عرض في رمضان 2021، مؤكدة أن تجربتها كانت ناجحة ومليئة بالتفاهم والود داخل مواقع التصوير.

وقالت سمية في تصريحات تلفزيونية: محمد رمضان من أبسط النجوم والشخصيات، بسيط وحبوب، وبيتعامل مع زمايله في اللوكيشن بلطافة، كنا فريق عمل متكامل، وكنا بنراجع المشاهد سوا، ولو في حاجة محتاجة تعديل كنا بنعمل ده مع بعض، موضحة أنها لم تواجه أي صعوبة في التعاون معه، على عكس ما يُشاع عنه، واصفة إياه بـ"الصديق العزيز".

تحدثت سمية الخشاب عن مشهد حمل محمد رمضان لها والذي صادف عرضه في شهر رمضان المبارك، ما تسبب في ردود فعل متباينة عبر مواقع التواصل الاجتماعي قائلة: "دي مش أحضان، ده واحد بيشيل مراته، عادي جدًا المشهد ما فيهوش أي حاجة خارجة أو إهانة لأي شهر أو شعيرة، الدراما كانت تتطلب ده، والمخرج هو صاحب الرؤية". 

وأكدت أنها لم تنزعج من الجدل المثار، مضيفة: "المشهد طلع ترند، والناس كانوا بيطلبوا من محمد رمضان بعدها يشيلهم زي ما شال مراته".

سمية الخشاب:  لما الفنانين بيكحوا بيطلعوا ترند

عن ظاهرة التصدر المستمر للترند، أوضحت الخشاب أن هذا أصبح سمة طبيعية لأي عمل فني قائلة: "إحنا بنطلع ترند وإحنا بنكح، فنعمل إيه؟ مش كل الناس هتسقف لك. طبيعي يكون في انتقادات".

وشددت على أن هدف الفنانين هو إسعاد الجمهور قدر الإمكان، وقالت: "ممكن العمل يكون فيه ثغرات أو حاجات ما عجبتش بعض الناس، بس عجبت ناس تانيين. المهم إننا بنشتغل بإخلاص وبنحاول نقدم حاجة كويسة".

مشهد زفاف سمية الخشاب على محمد رمضان وطليقها أحمد سعد يغني

في واحدة من أكثر لحظات المسلسل إثارة للجدل، شارك الفنان أحمد سعد، طليق سمية الخشاب، في أداء أغنية زفافها على محمد رمضان داخل المسلسل، ما فتح الباب أمام تساؤلات الجمهور حول طبيعة علاقتهما الحالية.

سمية علّقت على الأمر بابتسامة: "أنا مش بفكر في الجواز حاليًا، بس لو اتطلب مني أغني معاه في فرح، طبعًا هعمل كده، عادي جدًا". وتابعت مؤكدة أنه لا توجد أي مشاكل بينها وبين سعد: "ما عنديش مشكلة معاه خالص، وأنا فرحانة بنجاحه، وسعيدة إنه بيتقدم في شغله".

كشفت سمية الخشاب كواليس مشاركة أحمد سعد مجددًا في العمل، وقالت: "المخرج كلمني وقال لي: في أغنية حلوة جدًا عاملها أحمد سعد، ولو عملها هتبقى مختلفة ومناسبة جدًا للفرح، ووجوده معانا هيبقى إضافة". 

وأضافت: "قلت له طبعًا هاته، تمام وزي الفل، بالعكس، توكلنا على الله".

وأكدت أنها لم تمانع أبدًا في ظهوره بالمسلسل، بل رحبت بالفكرة واعتبرتها خطوة إيجابية، قائلة: "الناس كلها كانت بتستغرب وتقولي: إيه الست دي؟! إنتي جبارة".