أحمد جعفر لـ الأيام المصرية: بيراميدز محتاج 150 سنة عشان ياخد مكان الزمالك
أكد أحمد جعفر لاعب نادي الزمالك السابق، أن مباراة نهائي بطولة كأس مصر بين الفارس الأبيض ومنافسه بيراميدز، ستكون صعبة على الفريقين، في ظل التقارب في المستوى بين اللاعبين.
ويتجدد اللقاء بين الزمالك وبيراميدز للمرة الثالثة هذا الموسم، لكن هذه المرة بنهائي كأس مصر في الثامنة والنصف مساء غدًا الخميس، حيث سيكون الجمهور على موعد مع مباراة من العيار الثقيل كما هو معتاد من الفريقين طوال الـ 6 سنوات الماضية.
وحرص موقع الأيام المصرية على إجراء حوار مع أحمد جعفر، أحد أبرز المهاجمين الذين مروا على القلعة البيضاء آخر 15 سنة، للحديث عن الجوانب الفنية للفريقين قبل اللقاء المرتقب، لننتقل إلى نص الحوار.
توقعاتك لمباراة الزمالك وبيراميدز وشكل الفريقين على أرضية الملعب ؟
"المباراة هتكون صعبة جدًا طبعًا وخاصة مع فريق محترم زي بيراميدز لكن أنا واثق في لاعبي الزمالك هم لعيبة كويسة جدًا محتاجين روح في الملعب طول الـ 90 وإن شاء الله يقدروا يجيبوا الفوز".
"اللعيبه كلها في مصر مستوياتهم متقاربة وكلهم شبه بعض، فيه فروقات فردية بسيطه جدًا".
من الناحية المعنوية، من يحتاج التتويج بالكأس أكثر من الآخر ؟
"الزمالك طبعًا محتاج الكأس أكتر من أي فرقة وإن شاء الله يكسب البطولة ونفرح كلنا ويفرحوا جمهور الزمالك اللي يستاهل باذن الله".
هل فوز بيراميدز بدوري أبطال إفريقيا يؤثر عليه بالسلب أو الإيجاب في نهائي كأس مصر
"ممكن لو الزمالك قدر يستغل نشوة بيراميدز، في الكرة المصرية دايمًا لما فريق يكسب بطولة كبيرة بعدها بتكون في نتائج سلبية".
"الزمالك لازم يستغل فوز بيراميدز بـ دوري أبطال إفريقيا لصالحه، لكن لو قدروا يفصلوا بعد فرحة البطولة وركزوا في الملعب أكيد المباراة هتكون صعبة جدًا".
هل ترى أن بيراميدز أخذ مكانة الزمالك في الكرة المصرية ؟
"بيراميدز لو قعد طول حياته ما يقدرش ياخد مكان الزمالك، مع احترامي طبعا ليهم والأشخاص الموجودين كلهم اخواتي وحبايبي وفيهم لعيبه لعبت معاها في الزمالك أصدقائي، كمان الناس المسؤولين حبايبي جدًا طبعا لكن استحاله ياخذ مكان الزمالك لا يمكن".
"مفيش نادي عامة استثماري يقدر ياخد مكان نادي جماهيري حتى لو الجماهيري ده مكسبش بطولات، يعني مثلا الإسماعيلي استحالة بيراميدز ياخد مكانه".
"بيراميدز عشان ياخد مكان الزمالك محتاج جماهيرية ومحتاج 150 سنة ودة مش ممكن يحصل طبعًا".
في ظل قلة الخيارات في قائمة الزمالك، ما التشكيل الأنسب للفريق في نهائي الكأس
"ممكن يبقى عواد في حراسة المرمى وخط الدفاع محمود بنتايك، حسام عبد المجيد، الونش، عمر جابر وفي نص الملعب ممكن دونجا ومحمد شحاتة وأحمد فتوح ويدي حرية لعبد الله السعيد ومصطفى شلبي وسيف الجزيري ويلعب على السرعات، دي كويسة جدًا ومتوازنة وتقدر تمسك الكورة وتدافع كويس جدًا".
"ممكن برضو خطة ثانية اللي هو هيشيل مثلًا فتوح من قلب الملعب ويحط دونجا وشحاتة وقدامهم عبد الله ويبقى ناصر ماهر والجزيري ومصطفى شلبي، في أكتر من تشكيلة للزمالك وأكتر من سيناريو يقدر يشتغل بيه".
كان هناك جزء كبير من جمهور الزمالك حاضرًا لدعم بيراميدز في دوري أبطال إفريقيا، هل تعتقد أنه مع الوقت سيتخلى الجمهور الزملكاوي عن ناديه ويتجه لتشجيع بيراميدز الأكثر استقرارًا ؟
"مين اللي قال كده مفيش الكلام ده ومفيش جمهور في الدنيا يروح شجع فريق تاني ده مستحيل، ممكن يتعاطف مع نادي تاني لو بيلعب مثلا في بطولة خارجية أو بيواجه المنافس بتاعه لكن مش هيشجعه".
"جمهور الزمالك عمره ما يتخلى عن ناديه أبدًا ولو ده ممكن يحصل كان حصل من زمان، الزمالك وقع كتير ورجع تاني وقف الحمد لله وهيفضل يقع ويقف، مفيش نادي في الدنيا بيستمر على حاله".
ما رأيك في دور لجنة التخطيط بنادي الزمالك حتى الآن ؟
"كويسين جدًا وأنا بشوف إن فكر ميدو كويس جدًا ومؤيد لكلامه، أنا لعبت في الزمالك وحضرت مجالس إدارات عشوائيين جدًا ومعندهمش فكر".
"ميدو عنده فكر وعايز يحط نظام أوروبي وده مش عيب، هو راجل لعب في أوروبا وشاف الدنيا بتمشي ازاي، المفروض مجلس الإدارة يساعد واحد بالفكر ده عشان على الأقل نبني كوادر بعد كده ويبقا عندنا نظام ماشيين عليه".
"نادي الزمالك كل سنتين يحل مجلس الإدارة وييجي مجلس جديد، احنا عايزين استقرار لفترة طويلة وقطاع ناشئين محترم نطلع منه لاعيبة كويسة زي الأول بما إن مفيش موارد مالية نشتري صفقات من بره".
"وأنا موجود في الزمالك في 2010 طلع معانا من الناشئين: محمد إبراهيم وعمر جابر وحسن يوسف ولاعبية جامدة جدًا والزمالك لازم يرجع يعتمد على الناشئين دول وهو ده اللي ميدو عايزه".
