مدبولي: أنا كرئيس حكومة مش هتكلم في الدولار وبطلب من المصريين يدعوا ربنا

أكد الدكتور مصطفى مدبولي رئيس الوزراء خلال حديثه عن الدولار أنه إذا راجعنا بعض التقارير الدولية من ست شهور، كان هناك تكهّن – في وقت ما كان  سعر الدولار تجاوز الـ50 والـ51 – كان هناك تكهّنات إن الدولار هيزيد، وهيبقى في متوالية في الزيادة.

أشار إلى أنه مثل هذه التكهنات بحدوث زيادات ليست مبنيّة على دراسات اقتصادية، بقدر ما هي لها بعض الأغراض الأخرى.

أضاف مصطفى مدبولي: ما بحبّش دايمًا أتكلم، لأن إحنا عايزين نغير ثقافتنا كمصريين، أنا ما طلعتش ولا جيت وقلت لكم هو سعر الدولار النهاردة بقى كام، هو ليه لما حصل من شهرين زيادات وبقى 51 وشويّة، الناس كلها قالت: يعني إيه ده؟ إيه اللي بيحصل؟ طب هو دلوقتي بكام؟ ما حدّش بيتكلم ليه؟ إن هو بينزل أو نزل.

وأكمل : أنا كرئيس حكومة لن أتكلم في الدولار، دي مسؤولية محافظ البنك المركزي، وهو يدير باحترافية شديدة السياسة النقدية للدولة، أهم حاجة بالنسبة لي، وده شيء آخر، أنا كان عندي لقاء مع السيد المحافظ ، كنا مع بعض من يومين، وأكد لي إن إحنا – الحمد لله يا رب – وتاني، يعني، بندعو الله وبطلب من المصريين كلهم يدعوا، إن عندنا، إن مواردنا – لثالث شهر – الموارد الدولارية من السوق المحلي مغطّية احتياجات الدولة.

مصطفى مدبولي يتحدث عن الاقتصاد المصري

وطمأن رئيس الوزراء جموع المصريين بدوران عجلة الاقتصاد قائلا:  الحمد لله، وأنا بطمن المصريين في هذا الأمر، العجلة دايرة الحمد لله بصورة جيدة جدًا، وندعو الله إنها تستمر خلال الفترة الجاية، بل بالعكس، يعني، لدينا الطموح والخطط، وهذا الملف كان جزء  العرض مع السيد الرئيس عبد الفتاح السيسي حول كيفية أن تتمكن الدولة المصرية في خلال الفترة القادمة أن تفوق مواردها استخداماتها، وبالتالي يبقى عندنا استقرار كامل، ولا نكون عُرضة لأي عوامل خارجية من شأنها أن تؤثر علينا في الداخل.