لن أتنازل عن حق أولادي ومحدش فوق القانون، أبرز تصريحات زينة مع عمرو أديب

كشفت الفنانة زينة في مداخلة هاتفية مع الإعلامي عمرو أديب، عبر برنامج الحكاية على قناة MBC مصر، تفاصيل صادمة عن تعرض أحد أبنائها للإصابة داخل ملعب بأحد الكمبوندات السكنية نتيجة مطاردة من كلب شرس، مؤكدة أن الواقعة تحولت إلى أزمة معقدة بسبب تدخل أطراف سياسية، وأنها متمسكة بحق أولادها ولن تتنازل عنه.

أبرز تصريحات زينة مع عمرو أديب

بدأت زينة حديثها قائلة: "هما اتهموني إني بجري بالعربية عشان أخبط الولد، على أساس إني مجنونة ومعنديش ولد زيه، بس الحقيقة إني كنت بجري عشان ألحق فرد الأمن وأسأله ابن مين ده".
وأضافت:"أنا عملت المحضر وأخدت تحويل على مستشفى الشيخ زايد للولدين، وطلعلي كشف طبي".

وتساءلت:"أنا عايزة أعرف إزاي كلب متوحش وبالحجم ده يمشي مع طفل في السن ده ويدخل بيه ملعب كله أطفال من غير كمامة وغير مرخص ويهجم على ولادي بالشكل ده؟".
 

شددت الفنانة زينة على تمسكها بالقانون قائلة: “أنا عايزة حق ابني وبطالب بحق ابني، المفروض يستنوا لما تحصل مصيبة ويعض ابني، زي الحادث الشهير قبل كده”.
"أنا بطالب عن طريق حضرتك بتفريغ الكاميرات، لأننا في بلد قانون ومفيش حد فوق القانون، وبطالب بمسؤولية الأب والد الطفل، وهأخد حقي بالقانون، أنا متعودة أخد حقي بالقانون، وكل مسؤول لازم يتحاكم".

كشفت زينة أنها طلبت اعتذار الطفل لابنها "زين": "الولد في البداية قال (أنا مقصدش)، فقلت له: لا يا حبيبي، المفروض تقول (أنا آسف)، وبالفعل قالها، فشكرته وقلت له إنه ولد محترم".

لكنها فوجئت برد فعل عنيف من الأم: "فجأة والدته بدأت تصرخ وتقول لابنها متعتذرش يا آدم، دي مريضة نفسيًا، وفضلت تشتم تاني، نفس اللي حصل أول مرة".

قالت زينة إنها طلبت بطاقات هوية الأشخاص الذين شتموها: "قالولي إنهم هينزلوا الولد يعتذرلي، لكني طلبت أشوف بطايق الأشخاص اللي شتموني، ورفضوا يظهروها، بعدها اكتشفت بالصدفة إن الطفل اسمه آدم".

تابعت زينة:"فوجئت بوجود النائب محمد الجارحي، عضو مجلس النواب عن حزب مستقبل وطن، داخل القسم، وكان مع أسرة الطفل، وقال إنهم من أقاربه وضيوف عنده في نفس الكمبوند".

وأضافت:"طلبت اعتذار الطفل وافق النائب، إلا أن والدته رفضت وطلبت منه عدم الاعتذار، ولما قلت إني هكمل بالإجراءات القانونية، رد النائب: (إحنا اللي بنكتب القوانين)".

وأوضحت:"فجأة المحضر اتحول لمحضر إداري، وقالوا (مفيش كلب)، وإنهم هيعملوا لي محضر لو ما اتنازلتش، علشان والدة الطفل بنت عم نائب".
أكدت زينة رفضها لطريقة تربية الكلاب العشوائية: "الكلاب كائنات معندهاش مخ ومبتفهمش، وممنوع يمشي من غير كمامة، أنا عندي كلاب، بس عمري ما أمشي كلب مع عيل أبدًا".

واختتمت حديثها بالكشف عن التأثير النفسي للحادث على أولادها: "عيالي كان عندهم امتحانات ومراحوش الامتحانات من الخضة اللي شافوها".