هادي الباجوري: «البوسة في فيلم قمر 14 اتعملت أزمة من لا شيء»

أثار المخرج هادي الباجوري الجدل خلال لقائه في برنامج سبوت لايت مع الإعلامية شيرين سليمان، الذي يعرض على قناة صدى البلد، وتحدث عن مشهد القبلة في فيلمه قمر 14، مؤكدًا أن الضجة التي أثيرت حول المشهد كانت مبالغ فيها، وقال: "لحد النهاردة بنتفرج على أفلام أبيض وأسود فيها كل حاجة، إيه المشكلة في البوسة؟ عملوا منها حدوته كبيرة جدًا، البوسة إللي في الفيلم كانت بوسة حب، أكتر من كده أنا نفسي مش هعمله".

وأضاف أنه يدرك الثقافة والعادات والتقاليد المصرية، ولا يسعى لمخالفتها، قائلًا: "أنا فاهم الثقافة بتاعتنا وعارف إحنا فين، ومش جاي أشقلب الدنيا بس في النهاية أنا عارف بعمل إيه".

هادي الباجوري: مينفعش ممثلة ترفض مشهد لأنها متجوزة

وقال الباجوري إن الممثل لا يفترض أن يختار المشاهد بناءً على مشاعره الشخصية، بل عليه الالتزام بالدور، قائلًا: "مينفعش ممثلة أطلب منها بوسة وهي ترفض عشان متجوزة أو لأي سبب شخصي مينفعش لأن المشهد محتاج ده، العلاقة بين الشخصيات تتطلب نظرة، لمسة، حضن، قبلة، ده مش طلب شخصي ده تمثيل".

كما وجه انتقادات لبعض العاملين في الوسط الفني الذين ينادون بالقيم في العلن بينما يمارسون النفاق في الخفاء، وقال: "في ناس تقولك أنا بشتغل في الصناعة دي، بس عندي حدود طيب هو ده صدق؟ لا ده نفاق إحنا ناس بوشين، وعايزين نفضل نضحك على بعض".

هادي الباجوري: الفن مش دايمًا بيقدم رسالة

وتحدث الباجوري عن فلسفته الفنية، مؤكدًا أن الفن ليس بالضرورة رسالة مباشرة طوال الوقت: "مش لازم كل فن يكون رسالة، ممكن أعمل فيلم كوميدي وفيه رسالة، وممكن أقدم حاجة إنسانية بسيطة توصل فكرة من غير وعظ مباشر".

وتابع هادي الباجوري: "الناس تقولك البوسة غلط، طب وإيه إللي بيحصل في بيوتنا؟ البنات والأولاد بيتفرجوا على أفلام أجنبية فيها أكتر من كده، فين الرقابة في البيت".

هادي الباجوري: الناس بترفض إن ولادها يقلدوا الرومانسية ومعندهمش مشاكل مع العنف

وانتقد المخرج ازدواجية الخطاب المجتمعي، حيث تهاجم بعض المشاهد في السينما، بينما يتم التساهل مع محتويات أخرى أكثر عنفًا أو انحرافًا، موضحًا: "الناس تخاف من أن أولادها يقلدوا مشاهد الحب، لكن معندهمش مشكلة يشوفوا دم وسلاح وقتل، طب ليه مبنقولش إن العنف هو إللي خطر"، وتابع: "دايمًا نحب نعمل دربكة حوالين موضوعات معينة ونترك الأهم، بدل ما نضحك على بعض، نواجه نفسنا".

واختتم هادي الباجوري تصريحاته بالتأكيد على حقه كمخرج في تقديم رؤيته الفنية، وأن الجمهور هو صاحب القرار في مشاهدة العمل أو لا: "أنا هعمل إللي شايفه صح لو مش عاجبك، متتفرجش لكن متطلبش مني أغير رؤيتي عشانك".