محمد رمضان يكشف كواليس مفاجئة بعد رحيله عن الأهلي.. اعرف التفاصيل
تحدث محمد رمضان المدير الرياضي السابق بالنادي الأهلي، عن فترة عمله مع فريق الكرة وكشف عن تفاصيل مفاجئة في أزمات أثارت الجدل في الوسط الرياضي خلال الفترة الماضية.
محمد رمضان يكشف كواليس أزمة كهربا مع كولر
قال رمضان في تصريحات لبرنامج الكورة مع فايق: "لما جيت الأهلي كان في بعض الخلافات بين مارسيل كولر وبعض اللاعبين، في مشاكل كانت فنية لأن اللاعبين كانوا فاكرين إن عدم مشاركتهم يعني المدرب مش بيحبهم، وده مش صح".
وأضاف: "فيه مشاكل كمان كانت أخلاقية، بعض اللاعبين كانوا بيتكلموا مع المدرب بصوت عالي، يمكن يكون عادي برا مصر، لكن هنا لازم يكون في احترام للكبير".
وتابع: "أما مشكلة كهربا كانت تجاوز لفظي في حق كولر ودي مش كانت كارثة كبيرة، بس كان لازم نفرض الانضباط في الموقف ده وأول خطأ كان المفروض تكون العقوبة عليه صارمة".
وواصل "حضرت الموقف بين كهربا وكولر، وتاجوزات كهربا طالتني، لما سمعته، قلت له: 'إيه اللي انت بتقوله ده؟'، حاول بعض اللاعبين يدافعوا عن كهربا وقالوا إنه مش قصده، لكنه رد وقال: 'لا، أنا أقصد'".
وأضاف: "اللاعبين طلبوا مني إنهم مش عايزين كهربا يرجع مصر، وحسيت إنهم كانوا 'جدعان مع بعض' في الموقف ده، لدرجة إنهم كانوا مستعدين يدفعوا المليون جنيه فورًا علشان ما يغادرش. قلت لهم إني مش ممكن أتراجع عن قراري، لكن ممكن أخفض الغرامة للنصف لو فازوا في المباراة الجاية وده خلق لهم دافع".
"وعن إقالة كولر قال: "حسيت إن شغفه بدأ يقل في الفترة الأخيرة، ويمكن ده كان السبب في التراجع. فيه مدربين كانوا بينجحوا بسبب شخصيتهم الطيبة، وكنا بنديهم كل حاجة عشان كده".
واختتم: “في آخر أسبوعين، بدأ كولر يجتمع مع اللاعبين ويتكلم معاهم ويعدهم، ويوفي بوعوده، مش زي ما كانوا بيشتكوا قبل كده، يمكن التوقيت مكنش مناسب، ويمكن كان هيقدر يرجع شغفه تاني، لكن كل حاجة اتغيرت بهدف واحد في ماتش صن داونز”.
