مصطفى عنبه: اشتغلت في ورشة لحام وكنت أدي الـ15 جنيه اللي بقبضها لأمي علشان أحس إني راجل
مصطفى عنبه في برنامج اسرار .. يحل المطرب الشعبي عنبه ضيف حلقة اليوم الخميس 13 مارس 2025 من برنامج " أسرار" مع الإعلامية أميرة بدر المذاع على قناة النهار.
مصطفى عنبه في برنامج اسرار: كنت لعيب وروحت اختبارات النادي الأهلي
قال المطرب مصطفى الملقب باسم عنبه: "اسم عنبه اتقالي كإهانة، لأن كنت دايما بلعب كورة وحاطط عنب في جيبي، ومكنتش قادر أكل الفاكهه في البيت فكنت بأكل وأنا بلعب، وكانت عادة وفي حد قالي عنبه فضايقت فكل ما يبقى في حد عايز يضايقني يقولي يا عنبه، لحد ما جيت أغني كنت عايز اطلع اسم جديد تركي مثلا بس مش لايق فقالولي عنبه".
وأضاف عنبه: "أنا كنت لعيب ورحت اختبارات النادي الأهلي، ونجحت في الاختبار الأول والتاني وجه الاختبار الثالث المدرب بص وقال بن فولان الفلاني مبروك"، ضاحكا:" هو أنا بيقت زملكاوي من شوية".
وذكر "أنا من أسرة فقيرة وكنت راضي جدا، واتربيت على الرضا، والدي ووالدتي قصة نفسي أقابل القصة دي في حياتي، هي كانت الزوجة اللي صابرة على جوزها على الحلوة والمرة، والدي ووالدتي راحوا للمأذون يجي 15 مرة، ويبصوا لبعض لا مش هينفع نطلق علشان العيال".
وتابع، "كان في مشاكل ما بين أهلي علشان الورث ووالدتي من مصر الجديدة وكنا بنتعاير علشان أنا وأخويا مبنشتغلش".
عنبه: جالي فيروس A وأنا صغير
واشتغلت في ورشة لحام وجالي فيروس A وكنت مهما بغسل إيدي الشحم مبيطلعش منها وكلت بيها مرة فجالي المرض وكنت، في الأسبوع بأخذ 15 جنيه وبديها لأمي علشان أحس إني راجل.
"وبعد كده اشتغلت في الدوكو والسمكرة، ولما يديني صاحب الورشة شنطة رمضان كنت ببقى هطير من الفرحة وأنا داخل بيها على أمي لأن الحاجات دي أنا مقدرش أجيبها"
وأضاف، "وجت علينا أيام كنا بنفطر في رمضان عيش وبتنجان".
عنبه: جبت 96% في 3 إعدادي ومكنتش بأخد دروس
وأوضح، كنت بدرس وكنت خايف من ثانوي وجبت في 3 إعدادي 96%، ووالدتي كانت اللي بتذاكرلي من بعد ما اخلص شغلي، ومأخدتش ولا درس"، مضيفًا "أنا عارف كابوس ثانوية عامة، فبدأت اقنع أمي بالسلبيات وقولت لوالدتي أنا عايز أدخل صنايع، واطردت من مدرسة صنايع بسبب إن كله مستخسر المجموع".
وذكر باكيا، "دخلت مدرسة سياحة وفنادق في النزهة وكانت سياحة وفنادق بكشف الهيئة مش عايز اعيط، وأنا كنت داخل بقدم وفي واحدة شافتني كانت هي اللي مسؤولة عن كشف الهيئة وقالتلي أنت شكلك كويس قولتلها أنا مش عايز اتعب أهلي في المصاريف قالتلي كل اللي مطلوب قميص وبنطلون وجزمة قولتلها أنا مش هقدر اجيب الجزمة قالتلي أنا هجبهالك وأنا نفسي أعوضها، وهي كانت سبب كبير في إن أنا أكمل تعليمي".
