محافظ الشرقية لـ«الأيام المصرية»: أنا شديد في الحق ومفيش أطيب مني
قال المهندس حازم الأشموني محافظ الشرقية، إن أي مواطن يرغب في الحصول على وظيفة ويحضر معنا لقاءات المواطنين، نقوم بتوفيرها له في الحال "وقبل الخروج من باب المحافظة بيطلع واخد وظيفته"، هذا بالنسبة للمواطنين الراغبون في السعي والعمل بجد.
وأوضح محافظ الشرقية في حوار خاص لموقع الأيام المصرية، أن هناك نوعين موجودين من الناس، واحد عاوز يشتغل في شغل جنب البيت وواحد في الحكومة فقط ومبيشتغلش قطاع خاص، لافتا أنه تم الاهتمام بذوي الهمم وتوفير فرص عمل لهم في المصانع "ووزارة العمل عاملة شغل محترم معانا في الموضوع ده" فالمحافظة لا تترك أحدا من ذوي الهمم زي ما وصانا الرئيس عبد الفتاح السيسي، سواء يقدر يروح الشركة أو معندوش الإستطاعة يروح، وبيكون له راتب ثابت"، وأتحدى أي حد يكون لجأ للدولة في النقطة دي ولم تكن موجودة.
وفي رده على سؤال عن علاقته بالموظفين داخل المحافظة، قال الأشموني "أنا شديد في الحق بس، وهما جربوا كده في الأمور العادية، ما أتخيلش هما شافوا حد أطيب مني، لكن الحاجة اللي بتخلي الإنسان ياخد اتجاه الشدة هي الغلط أو التعدي على الحدود وهي من أصعب الأمور في الدنيا، حق الغير للغير دي حاجة صعبة ولما بنوصل للنقطة دي خلاص لازم يكون فيه شدة".
